Լիբանանի մայրաքաղաք Բեյրութում և մի շարք այլ քաղաքներում տնտեսական ճգնաժամի շարունակական խորացման և սև շուկայում դոլարի փոխարժեքի շարունակական աճի պատճառով ցույցերը շարունակվում են։
Հարյուրավոր քաղաքացիներ Տրաբլուսշամ, Սայդա, Նաբատիյա, Սուր, Բեքա քաղաքներում փակել են փողոցները։ Ցուցարարները դադարեցրել են նաև Բեյրութի կենտրոնական «Ռինգ» կամրջի երթևեկությունը։ Անվտանգության աշխատակիցները փորձել են վերականգնել այն, նրանց և ցուցարարների միջև բախումներ են տեղի ունեցել։
Ցուցարարներն այս կերպ իրենց բողոքն են արտահայտում երկրում շարունակվող թանկացումների և հետզհետե աճող գործազրկության դեմ։ Բացի այդ, թեև երկրի Կենտրոնական բանկը կայուն է պահում տեղական դրամական միավորի փոխարժեքը, սև շուկայում լիրան շարունակում է արժեզրկվել։ Կենտրոնական բանկի կողմից 1 դոլարի համար սահմանված փոխարժեքը 1500 լիբանանյան լիրա է, բայց սև շուկայում այն հասնում է մինչև 6000 լիրայի։
Նշենք, որ Լիբանանում ցույցերը սկսվել էին դեռ երկու շաբաթ առաջ՝ դոլարի փոխարժեքի աննախադեպ աճի պատճառով։ Այն ժամանակ ցույցերը մի քանի օր տևեցին, Բեյրութում որոշ աշխատավայրեր հրդեհվեցին, իսկ Տրաբլուսշամում անվտանգության ուժերի և ցուցարարների բախումների հետևանքով 109 մարդ վիրավորվեց, որոնցից 20-ը՝ զինվորական։
Հետևեք մեզ տելեգրամում
