Ադրբեջանի նախագահ Իլհամ Ալիևը 2020թ. Առաջին կիսամյակի սոցիալ-տնտեսական զարգացման արդյունքների ամփոփմանը անդրադարձել է մի շարք հարցերի, այդ թվում նաև արցախյան հակամարտության, Ադրբեջանի ԱԳՆ գործունեությանը և այլն: Իր խոսքում Ալիևը բացահայտ դժգոհություն է հայտնել ԱԳ նախարար Էլմար Մամեդյարովի աշխատանքի վերաբերյալ մեղադրելով նախարարին հատկապես վերջին օրերին աշխատանքում ցուցաբերած անպատասխանատվության մեջ։
«Հայաստանի վարչապետը ասում է, որ «Ղարաբաղը Հայաստանն և վերջ»: Ես դրա պատասխանը տվել եմ: Արտաքին գործերի նախարարությունը դրան պատասխանել է, թե ո՞չ: Ես չեմ լսել, Ադրբեջանի ժողովուրդն էլ չի լսել: Դա առաջին հերթին ո՞վ պետք է անի: Արտաքին գործերի նախարարությունը լռում է: Ես ասել եմ, որ մինչև բանակցային գործընթացում առաջընթաց ձեռք չբերվի, չի կարող խոսք գնալ Հայաստանի հետ որևէ համագործակցության մասին: Դու մի ասա, կորոնավիրուս է քննարկվել»,-նշել է Ալիևը
Ալիևը խիստ քննադատության է ենթարկել ԱԳ նախարար Էլմար Մամեդյարովին, նշել է, որ վերջին օրերին անընդհատ կապի մեջ է եղել իր օգնական Հիքմեթ Հաջիև և մյուս պաշտոնյաների հետ, սակայն ԱԳ նախարարին չի կարողացել գտնել: «Արտգործնախարարությունը ինչո՞վ էր զբաղված: Որտե՞ղ էր: Հուլիսի 12-ի դեպքերից հետո մենք աշխատանքի վայրում էինք: Վարչապետը աշխատավայրում էր, ես աշխատավայրում էի, Պնախարարը, ԳՇ շտաբի պետը, ինչպես նաև պետանվտանգության ծառայության պետը, ՆԳ նախարարը, արտաքին հետախուզության ծառայության պետը, անվտանգության խորհրդի քարտուղարը մինչև առավոտ աշխատավայրում էին: Ես չկարողացա գտնել ԱԳ նախարարին»,-հայտարարել է Ադրբեջանի նախագահը:
Ալիև նաև նշել է, որ վարչապետից է հարցրել, թե որտեղ է Էլմար Մամեդյարովը և վարչապետի հարցմանը ի պատասխան ԱԳ նախարարը պատասխանել է, որ տանից է աշխատում:
Հետևեք մեզ տելեգրամում
