Եվրոպական խորհրդարանում մեծությամբ երկրորդ խմբակցությունը`«Սոցիալիստների և դեմոկրատների առաջադեմ ալյանսը» (S&D), Ադրբեջանի վերաբերալ հայտարարությամբ է հանդես եկել։ Հաշվի առնելով Ադրբեջանում մարդու իրավունքների հետ կապված իրավիճակի լրջությունը՝ հայտարարությամբ կոչ է արվել Եվրոպական միությանը՝ թիրախավորված պատժամիջոցներ կիրառել ադրբեջանցի այն պաշտոնյաների նկատմամբ, որոնք պատասխանատու են Ադրբեջանում ընդդիմության և քաղաքացիական հասարակության դեմ բռնաճնշումների համար:
S&D խմբի փոխնախագահ Քեթի Պիրին մտահոգիչ է համարել Ադրբեջանում մարդու իրավունքների վերաբերյալ զարգացումները և մասնավորապես ընդդիմադիր «Ժողովրդական ճակատ» (ԱՀ) կուսակցության նախագահի տեղակալ Ֆուադ Գահրամանլիի նկատմամբ Ադրբեջանի իրավապահ մարմինների կողմից դաժան խոշտանգումները, որոնց մասին հայտնի է դարձել հավաստի զեկույցներից:
Հայտարարության մեջ նշվել է, որ Գահրամանլին մեկն է այն տասնյակ ընդդիմադիր գործիչներից, որոնք ձերբակալվել են նախագահ Իլհամ Ալիևի ռեժիմի կողմից՝ հեղաշրջում նախապատրաստելու մեղադրանքներով և Ալի Քերիմլիի հետ ներկայումս ապօրինի կերպով գտնվում է դե-ֆակտո տնային կալանքում:
«Այս դատապարտելի գործողությունները մաս են կազմում նախագահ Ալիևի կողմից ընդդիմության անդամների ահաբեկման, ոտնձգությունների և ձերբակալությունների համակարգի։ Խախտելով Ադրբեջանի օրենսդրությունը և երկրի միջազգային պարտավորությունները` ոտնահարվում են նրանց հիմնական իրավունքները, ինչպիսիք են շփումը իրենց փաստաբանների և ընտանիքների հետ:
Նախագահ Ալիևը օգտագործում է COVID-19 համաճարակը և վերջերս Հայաստանի հետ ռազմական լարվածության աճը` որպես արդարացում երկրի քաղաքական ընդդիմության մնացորդները վերացնելու համար, ինչն անթույլատրելի է»,- ասված է հայտարարության մեջ:
Հետևեք մեզ տելեգրամում
