Իրանի Իսլամական Հանրապետության խորհրդարանում Թեհրանի և Հյուսիսային իրանահայության պատգամավոր Արա Շահվերդյանն այցելել է IRIB (Islamic Republic of Iran Broadcasting) ռադիոհեռուստատեսության արտասահմանյան թողարկումների հայերեն բաժին և մոտիկից ծանոթացել հայալեզու լրատվամիջոցի աշխատանքին:
«Որպես հայերեն ռադիոժամի ունկնդիր՝ կցանկանայի ասել, որ այս ռադիոն բազմաթիվ ծառայություններ է մատուցել հայկական մշակույթը տարածելու հարցում: Իրանում փոքրամասնությունների իրավունքների, հատկապես մարդու իրավունքների և քաղաքացիական ազատությունների վերաբերյալ տեղեկատվության տրամադրումը շատ կարևոր է»,-ասել է Շահվերդյանը:
Իրանահայ պատգամավորն ափսոսանք է հայտնել հայերեն ռադիոհաղորդումները FM ալիքից հեռացնելու որոշման կապակցությամբ՝ հույս հայտնելով, որ խնդիրը կբարձրացնեն ռադիոհեռուստատեսության կազմակերպության պաշտոնյաների, հատկապես, դոկտոր Փեյման Ջեբլիի հետ հանդիպման ժամանակ և միջոցներ ձեռնարկվեն դրանց լուծման ուղղությամբ:
Հետևեք մեզ տելեգրամում
