Սիրիայի հույն ուղղափառ համայնքը երկրի արևմուտքում գտնվող Համա քաղաքում ստամբուլյան Սուրբ Սոֆիայի տաճարի ճշգրիտ, բայց ավելի փոքր կրկնօրինակը կկառուցի։
Եկեղեցու հիմնարկեքի արարողությունն արդեն կատարվել է։ Ռուսաստանի աջակցությամբ իրականացվելիք շինարարական աշխատանքները նախատեսվում է ավարտել մեկ տարվա ընթացքում։ Կառույցը կծառայի որպես ուղղափառ եկեղեցի։
Նշենք, որ Սիրիայի Համա քաղաքի այն շրջանում, որտեղ պիտի կառուցվի քրիստոնեական նոր եկեղեցին, ավելի քան 17․000 ուղղափառ քրիստոնյաներ են բնակվում։
Հիշեցնենք, որ Ստամբուլի Սուրբ Սոֆիայի պատմական տաճարը կառուցվել է 532-537թթ․՝ բյուզանդական կայսր Հուստինիանոս Ա-ի հրամանով։ 1453թ․՝ Ստամբուլի գրավումից հետո, օսմանյան Մեհմեդ Ֆաթիհ սուլթանը տաճարը վերածեց մզկիթի։ 1934թ․ Թուրքիայի կառավարության որոշմամբ Սուրբ Սոֆիային տրվեց թանգարանի կարգավիճակ, իսկ 2020թ․ հուլիսին Թուրքիայի բարձրագույն դատական մարմինը՝ պետական խորհուրդը, չեղարկեց կառավարության 1934թ․ որոշումն ու Սուրբ Սոֆիան կրկին վերածվեց մզկիթի։
Հետևեք մեզ տելեգրամում
