ՀՀ ԱԳՆ մամուլի խոսնակ Աննա Նաղդալյանը լրագրողների հետ ճեպազրույցում հայտնել է, որ պաշտոնական Երևանը խորհրդակցությունների համար հետ է կանչել Իսրայելում ՀՀ դեսպան Արմեն Սմբատյանին:
Անդրադառնալով լուրերին, թե այսօր Իսրայելից երկու ինքնաթիռ է վայրէջք կատարել Բաքվում՝ այնտեղ զենք մատակարարելու համար՝ ԱԳՆ խոսնակը նշեց, որ Հայաստանը դիվանագիտական խողովակներով Իսրայելին հայտնել է, որ ցավալի է այդ երկրի կողմից Ադրբեջանին գերժամանակակից սպառազինության մատակարարումը, հատկապես այն ժամանակաշրջանում, երբ Ադրբեջանը Թուրքիայի աջակցությամբ ագրեսիա է իրականացնում Հայաստանի ու Արցախի դեմ:
«Իսրայելի կողմից Ադրբեջանին գերժամանակակից զենքի տրամադրումը մեզ համար անընդունելի է։ Մենք բազմիցս մեր իսրայելցի գործընկերներին հայտնել ենք այդ մասին։ Այս օրերին միջազգային հանրությունը կոչ է անում դադարեցնել մարտական գործողությունները, իսկ Իսրայելը զենք է մատակարարում Ադրբեջանին։ ՀՀ ԱԳՆ-ն որոշել է խորհրդակցությունների նպատակով հետ կանչել Իսրայելում ՀՀ դեսպանին»,-ասել է Նաղդալյանը:
Հետևեք մեզ տելեգրամում
