Նոյեմբերի 28-ին Ադրբեջանում տեղի է ունեցել իշխող «Նոր Ադրբեջան» («Ենի Ազերբայջան») կուսակցության քաղաքական խորհրդի արտահերթ նիստը, որի ընթացքում որոշում է ընդունվել ցրել խորհրդարանը:
Մամուլի ասուլիսի ընթացքում կուսակցության գործադիր քարտուղար Ալի Աhմեդովը նշել է, որ «այդ նախաձեռնությամբ կուսակցությունը ցանկանում է աջակցել Ադրբեջանի նախագահ Իլհամ Ալիևի կողմից իրականացվող բարեփոխումներին»:
«Ենի Ազերբայջան» կուսակցության քաղաքական խորհուրդը կոչ է արել իշխող կուսակցության պատգամավորներին նախաձեռնությամբ հանդես գալ և խորհրդարանի լուծարման վերաբերյալ նախագահին միջնորդություն ուղարկել:
Ահմեդովը հույս է հայտնել, որ խորհրդարանը ցրելու որոշումը մոտ ապագայում կընդունվի։
Ադրբեջանական ԶԼՄ-ները հայտնում են, որ ավելի վաղ իշխանությունները և Ալի Ահմեդովը կտրականապես հերքում էին այն լուրերը, որ նախապատրաստվում են լուծարել խորհրդարանը և արտահերթ ընտրությունների կազմակերպել:
Իշխող կուսակցության՝ խորհրդարանը ցրելու որոշման մասին ոճ միանշանակ կարծիք են հայտնել ընդդիմադիր կուսակցությունները։
Մասնավորապես, նրանցից «Ադրբեջանի Ժողովրդական Ճակատ» կուսակցության առաջնորդ Ալի Քերիմլին, անդրադառնալով այս զարգացումներին, ֆեյսբուքյան էջում գրել է, որ խորհրդարանը նախապես լուծարվում է, որպեսզի ռեժիմը հանկարծակի ընտրություններ անցկացնի իրենց հաջորդ կեղծիքների համար:
«Նրանք հասկանում են, որ բողոքող ընտրազանգվածն ամեն օր աճում է: Կառավարությունը դեռ չգիտի, թե ինչպես կփոխվի ուժերի դասավորվածությունը մինչև հաջորդ աշնանը:Կարող եմ վստահորեն ասել, որ ազատ ընտրություններ և բարեփոխումներ չարժե սպասել: Նրանք պատրաստվում են գողանալ ևս մեկ ընտրություն»,-գրել է ընդդիմադիր առաջնորդը:
Իսկ «Հանրապետական այլընտրանք» կուսակցության առաջնորդ Իլգար Մամեդովը, դրական համարելով որոշումը, ասել է.
«Խորհրդարանը լուծարելու հիմքերը ի հայտ եկան մայիսին, երբ Ազգային ժողովը հրաժարվեց ուսումնասիրել մեր ներկայացրած օրենսդրական նախաձեռնությունները: Այնուհետև խորհրդարանը խուսափեց իր օրենսդրական գործառույթներից, և դա հիմք հանդիսացավ լուծարման համար: Մենք լուծարումը դրական ենք համարում և պատրաստվում ենք ընտրություններին»:
Ընդդիմադիր «Մուսավաթ» կուսակցության ղեկավար Արիֆ Հաջիլըն ասել է, որ խորհրդարանը պետք է ցրվի, քանի որ այն չի ձևավորվել ժողովրդի կամքով:
«Բայց որպեսզի կրկին չստեղծվի այդպիսի խորհրդարան, անհրաժեշտ են բարեփոխումներ ընտրական օրենսգրքում », – գրել է Հաջիլըն իր ֆեյսբուքյան էջում:
Նշենք, որ իշխող կուսակցությունը խորհրդարանում բացարձակ մեծամասնություն է կազմում, ուստի սպասվում է, որ վերոնշալ որոշումը կընդունվի։ Ադրբեջանում խորհրդարանը ընտրվում է 5 տարի ժամկետով: Վերջին խորհրդարանական ընտրությունն անցկացվել էր 2015թ նոյեմբերի 1-ին: Հաջորդ ընտրությունը պետք է տեղի ունենար 2020թ. նոյեմբերին:
Հետևեք մեզ տելեգրամում
