Հայաստանի գլխավոր դատախազությունը սեպտեմբերի 27-ին Արցախի դեմ Ադրբեջանի սանձազերծած պատերազմին առնչվող նոր քրեական գործ է հարուցել՝ ահաբեկչության ֆինանսավորման հոդվածով։ Այն վերաբերում է Արցախի դեմ տարվող ռազմական գործողություններին մասնակցելու նպատակով Թուրքիայի և Ադրբեջանի ռազմաքաղաքական պաշտոնատար անձանց կողմից ահաբեկչական խմբավորումների ֆինանսավորմանը։
Նշենք, որ անցած ամիս՝ պատերազմի ընթացքում, քրեական գործ էր հարուցվել միջազգային ահաբեկչության հոդվածով։ Ձեռք էին բերվել տվյալներ այն մասին, որ Ադրբեջանը Թուրքիայի աջակցությամբ ռազմական գործողություններին մասնակցելու համար միջազգային ահաբեկչական խմբավորումների անդամների և վարձկանների է ներգրավել։
Ըստ ձեռք բերված փաստերի՝ Արցախի և Հայաստանի տարածքում ահաբեկչություն կատարելու նպատակով Թուրքիայի բարձրաստիճան պաշտոնատար անձինք գործել են կազմակերպված խմբի կազմում և դրամական միջոցներ, զենք և ռազմամթերք են տրամադրել «Սուլթան Սուլեյման Շահ /Ալ Ամշաթ», «Սուկուր», «Ալ Համզաթ», «Սուլթան Մուրադ» միջազգային ահաբեկչական խմբավորումներին։ Ահաբեկչական այս խմբավորումների կազմից էլ կատարել են ահաբեկիչ-վարձկանների ընտրություն, ապահովել նրանց սահուն, անարգել անցումը Սիրիայի և Թուրքիայի պետական սահմանով նախ Թուրքիայի, ապա Ադրբեջանի Հանրապետությունների տարածքներ:
2020թ. սեպտեմբերի 27-ից սկսած՝ «Սուլթան Սուլեյման Շահ /Ալ Ամշաթ» և «Սուլթան Մուրադ» խմբավորումների կազմում ընդգրկված շուրջ երկու հազարից ավել վարձկան անդամներն Ադրբեջանի Հանրապետության զինված ուժերի հետ ներգրավվել և ակտիվ մասնակցություն են ունեցել նախապես Արցախի Հանրապետության դեմ ծրագրված, համակարգված և նպատակաուղղված ռազմական գործողություններում:
Վերոգրյալի հիման վրա ՀՀ զինվորական դատախազությունում ահաբեկչության ֆինանսավորման դեպքի առթիվ հարուցվել է նոր քրեական գործ` ՀՀ քրեական օրենսգրքի 2171-րդ հոդվածի 2-րդ մասով նախատեսված հանցագործության հատկանիշներով:
Քրեական գործն ուղարկվել է ՀՀ քննչական կոմիտե՝ նախաքննություն կատարելու հանձնարարությամբ:
Միաժամանակ, ահաբեկչության, ահաբեկչության ֆինանսավորման արգելմանն առնչվող միջազգային պայմանագրերի կարգավորումներին համահունչ՝ ձեռնարկվելու են միջազգային-իրավական համագործակցության առկա մեխանիզմները՝ հիշատակված հանցագործությունները կատարած անձանց բացահայտելու, այդ հանցագործությունների համար միջազգայնորեն ճանաչված իրավական հետևանքները կենսագործելու ուղղությամբ:
Հետևեք մեզ տելեգրամում
