Թուրքիայի նախագահի աշխատակազմի հանրային կապերի վարչությունը հրապարակել է նախագահ Ռ․Թ․ Էրդողանի ապրիլքսանչորսյան ուղերձը, որը նա հղել է Պոլսի հայոց պատրիարք Սահակ արք․ Մաշալյանին։
Ողջունելով պատրիարքին և հայ համայնքի անդամներին՝ Էրդողանը ուղերձում նշել է․
«Հարգանքով ոգեկոչում ենք Առաջին համաշխարհային պատերազմի դժվար պայմաններում իրենց կյանքը կորցրած օսմանյան հայերի հիշատակը, մեր ցավակցություններն ենք հայտնում նրանց թոռներին»։
Նշելով, որ անկախ էթնիկ, կրոնական, լեզվական և մաշկի գույնի տարբերություններից, բոլորն էլ մեծ մարդկային ընտանիքի անդամներն են, Էրդողանը գրել է․ «Այս հողերում դարեր շարունակ բոլորս միասին ապրում ենք խաղաղության մեջ և հանգիստ ենք գտնում լուսինով և աստղով զարդարված մեր կարմիր դրոշի ներքո։
Մեզ միասին պահողը ո՛չ շահն է, ո՛չ էլ հաշվարկը, այլ նույն երկրի, նույն արժեքների, նույն բարձրագույն իդեալների հանդեպ մեր կապվածությունն է։ Մեզ բոլորիս համար հպարտության աղբյուր է Թուրքիայի Հանրապետության հավասար, ազատ և հպարտ քաղաքացիներ լինելը։ Մեր ընդհանուր/համատեղ մշակույթը հարստացել, զարգացել է հայ համայնքի՝ ճարտարապետության, երաժշտության և արվեստի մեջ ունեցած ներդրումների, ինչպես նաև դաստիարակած բազմաթիվ բժիշկների, ինժեներների, իրավաբանների, գործարարների և արհեստավարժ մասնագետների գիտելիքի և քրտնաջան աշխատանքի շնորհիվ։ Թույլ չենք տա, որ մոռացության մատնվի թուրքերի և հայերի՝ հարյուրամակներ տևած և մարդկության համար օրինակ դարձած համատեղ ապրելու մշակույթը։ Ոչ մեկին օգուտ չի բերել այն, որ քննարկումները, որոնք պետք է անեն պատմաբանները, երրորդ երկրների կողմից քաղաքականացվելով մեր երկրի դեմ միջամտության գործիք են դարձել։
Հավատում եմ, որ մեր ինքնությունը միայն մեր հոգու վրա անցյալի թողած ցավերի հիման վրա կառուցելը մեծ անարդարություն է նոր սերունդների նկատմամբ»։
Էրդողանն ուղերձում անդրադարձել է նաև Հայաստանի հետ հարաբերություններին։ Նշելով, որ թուրքերն ու հայերն արդեն բոլոր խոչընդոտները միասին հաղթահարելու հասունություն պիտի ցուցաբերեն , Էրդողանը ընդգծել է․
«Ինչպես Դուք (դիմում է Մաշալյանին) էլ գիտեք, այս հարցում միշտ անկեղծ ենք եղել, հարցը մեր միջոցներով լուծելու համար ջանքեր ենք գործադրել։ Միշտ տարբեր առիթներով արտահայտել ենք, որ պատրաստ ենք Հայաստանի հետ հարաբերությունները զարգացնել բարիդրացիության և փոխադարձ հարգանքի հիման վրա։ Ղարաբաղի ճգնաժամի լուծումից հետո մեր այս կոչը մեկ անգամ էլ բարձրաձայն կրկնել ենք։ Նույն կոչը կրկնում եմ»։
Էրդողանն ուղերձը հետևյալ կերպ է ավարտել․
«Ուրախությունները և տխրությունները կիսելը, պատմությունից ճիշտ դաս քաղելով ապագան կառուցելը մեր ձեռքերում է։ Թուրքիան շարունակելու է կատարել այս հարցում իրեն բաժին հասած պարտականությունները։ Շնորհակալություն եմ հայտնում մեր ազգի անբաժանելի մաս հանդիսացող մեր հայ քաղաքացիներին մեր երկրի վարած այս պայքարում ցուցաբերած անկեղծ աջակցության համար։ Այս մտածումներով մեկ անգամ ևս հարգանքով ոգեկոչում եմ օսմանյան հայերին, որոնց կորցրեցինք Առաջին համաշխարհային պատերազմի ընթացքում, կիսում եմ նրանց հարազատների ցավը, բոլորին փոխանցում եմ իմ սրտանց ողջույնները և սերը»։
Հետևեք մեզ տելեգրամում
