Մեսութ Օզիլը՝ Չինաստանի իշխանությունների «թիրախում». Ինչո՞ւ են սկսել թուրք ֆուտբոլիստին չսիրել Չինաստանում

Չինաստանի իշխանությունների և Արսենալի հայտնի թուրք ֆուտբոլիստ Մեսութ Օզիլի միջև լուրջ ճգնաժամ է առաջացել։ Չինաստանի ղեկավարությանը զայրացրել է սոցցանցում մի քանի օր առաջ թուրք ֆուտբոլիստի գրառումն այն մասին, որ «պաշտոնական Պեկինը խախտում է երկրում ապրող թյուրքական ծագում ունեցող ույղուրների կրոնական,խոսքի և մտքի ազատության իրավունքները»։ Ըստ ֆուտբոլիստի՝ ույղուրների նկատմամբ կիրառվում է բռնաճնշման ևխտրական քաղաքականություն»։

#HayırlıCumalarDoğuTürkistan 🙏🏼 pic.twitter.com/dJgeK4KSIk
— Mesut Özil (@M10) December 13, 2019

Թեմային նախ արձագանքել է Չինաստանի արտգործնախարարությունը՝ նշելով, որ թուրք ֆուտբոլիստի հայտարարությունները «անհիմն են և հավանաբար նրան մոլորության մեջ են գցել»։ Պաշտոնական Պեկինը գնացել է նաև գործնական քայլերի։ Ի նշան բողոքի՝ ֆուտբոլիստի գրառումից հետո, չինական հեռուստատեսության եթերով չեղարկվել էր Անգլիայի ֆուտբոլի առաջնության «Արսենալ» և «Տոտենհեմ» ֆուտբոլային ակումբների միջև կայացած հանդիպման հեռարձակումը։ Բացի այդ փակվել են նաև «Արսենալի» ֆան ակումբները Չինաստանում, ինչից հետո անգլիական ակումբը հանդես է եկել հայտարարությամբ՝ ընդգծելով, որ Օզիլի արտահայտած մտքերը արտացոլում են ոչ թե ակումբի, այլ անձամբ ֆուտբոլիստի դիրքորոշումը հարցի վերաբերյալ։

Իսկ այսօր հայտնի դարձավ, որ Օզիլի անունը հեռացվել է PES-2020 հայտնի համակարգչային ֆուտբոլային խաղի չինական տարբերակից։

Օզիլի և Չինաստանի միջև ստեղծված իրավիճակը լայն արձագանք է գտել նաև միջազգային և մասնավորապես բրիտանական մամուլում։ Մի շարք հայտնի պարբերականներ նշել էին, որ իրավիճակի կարգավորման համար նախևառաջ անգլիական ակումբը պետք է պաշտոնապես ներողություն խնդրի։
Ուշագրավ է, որ Թուրքիայում ոչ բոլորն են ողջունել թուրք ֆուտբոլիստի արարքը։ Ոմանց կարծիքով, Օզիլի պատճառով ույղուրների առանց այդ էլ «ծանր կացությունը» ավելի կվատանա և Չինաստանի իշխանությունները կմեծացնեն «ճնշումները»։

Նկատենք, որ սա առաջին դեպքը չէ, երբ Օզիլը ներգրավվում է նման քաղաքական սկանդալի մեջ։ Մասնավորապես, թուրք ֆուտբոլիստը մեկ տարի առաջ որոշել էր հեռանալ Գերմանիայի ֆուտբոլի հավաքականի կազմից։ Ֆուտբոլիստը նման որոշում էր կայացրել Թուրքիայի նախագահ Ռեջեփ Թայիփ Էրդողանի հետ արված համատեղ լուսանկարի առթիվ Գերմանիայում բուռն քննադատությունների ենթարկվելու պատճառով։

Ընդ որում՝ լուսանկարը արվել էր Թուրքիայի արտահերթ ընտրություններից առաջ։ Գերմանիայում լուսանկարը դրական արձագանք չունեցավ, քանի որ կարծիք կար, որ Օզիլ-Էրդողան հանդիպումը քաղաքական ենթատեքստ էր ունեցել։ Շատերը կարծում էին, թե Օզիլի միջոցով Էրդողանը փորձել էր Գերմանիայում նախըտրական քարոզչություն իրականացնել։