Դեկտեմբերի 1-ին Թբիլիսիի Իլիա Ճավճավաձեի անվան ազգային գրադարանում անցկացվել է «Անծանոթ պատմություններ» խորագրով ցուցահանդես՝ նվիրված անվանի դերասաններ, Հայաստանի ժողովրդական արտիստ Ֆրունզիկ Մկրտչյանի և Վրաստանի ու Հայաստանի ժողովրդական արտիստ Սոփիկո Ճիաուրելիի հիշատակին։ Ներկայացված էին բացառիկ ու հանրությանն անծանոթ լուսանկարներ՝ կինոաստղերի համատեղ նկարահանումներից, կյանքի դրվագներից։ Մշակույթի գործիչ Դավիդ Բեժիտաշվիլիի հեղինակային ցուցահանդեսը կայացավ Վրաստանում ՀՀ դեսպանության նախաձեռնությամբ, Վրաստանի խորհրդարանի մշակույթի հանձնաժողովի միջնորդությամբ և Վրաստանի Մշակույթի նախարարության աջակցությամբ։
Բացելով երեկոն, խորհրդարանի մշակույթի հանձնաժողովի փոխնախագահ Էկա Ճիճինաձեն ընդգծեց, որ երկու լեգենդար դերասանների անունները վաղուց արդեն անցել են ազգայինի սահմանն ու ոչ միայն բեմին, այլև հայ ու վրաց ժողովրդի սրտում ամուր կամուրջ գցել։ Դիմելով ներկաներին ՀՀ դեսպան Աշոտ Սմբատյանն իր երախտագիտությունը հայտնեց ցուցահանդեսի կայացմանն իր մասնակցությունը բերած յուրաքանչյուրին, հույս հայտնեց, որ այդօրյա միջոցառումն իր բովանդակությամբ ոչ միայն դարերով միահյուսված երկու ժողովուրդների բարեկամության, այլև մարդկային գեղեցիկ շփումների լավագույն դրսևորումներից մեկը դարձավ։ Ժողովուրդներին բարեկամացնելու ճանապարհին, նա մեծապես կարևորեց անհատների դերը, ում կերտած ներկան հավերժանում է տարիների ու դարերի մեջ։
ՀՀ դեսպանը խոսեց Սոփիկո Ճիաուրելիի յուրովի տաղանդի, անկրկնելի հմայքի մասին, մեջբերեց դերասանուհու անզուգական խաղը հատկապես «Կտոր մը երկինք» ֆիլմում, ուր մարմնավորելով հայ կնոջ դերն ու կոտրելով ժամանակի կարծրատիպերը, Սոփիկոյին հաջողվել էր գրավել հայ ժողովրդի սիրտը։ Ցուցահանդեսի հեղինակը կիսվեց երկու լեգենդար դերասանների մասին հետաքրքիր պատմություններով։ Միջոցառման ընթացքում ցուցադրվեցին նաև դերասանների մասնակցությամբ ֆիլմերի կոլաժներ։ Դերասաններին մարմնավորող խամաճիկներով հանդես եկավ Թբիլիսիի Գ․Միքելաձեի անվան պետական տիկնիկային թատրոնը։ Երեկոն վարեց անվանի հեռուստալրագրող Նիկոլոզ Ծուլուկիձեն:
Հետևեք մեզ տելեգրամում
