Ամերիկայի Միացյալ Նահանգների Պետքարտուղարության Հյուպատոսական գործերի բյուրոն մայիսի 18-ի դրությամբ թարմացրել է ճանապարհորդային խորհրդատվությունը իր երկրի քաղաքացիների համար՝ կոչ է արել COVID 19-ի պատճառով չայցելել Հայաստան և Ադրբեջան: Երկրները դասվել են վտանգավորության չորրորդ աստիճանի երկրների շարքին: Մայիսին ընդհանուր առմամբ չորրորդ աստիճանի վտանգավորության են դասվել 14 երկիր:
ԱՄՆ հիվանդությունների վերահսկման ու կանխարգելման կենտրոնը նշել է, որ Հայաստանում և Ադրբեջանում կորոնավիրուսի տարածվածության մակարդակը շատ բարձր է։
Հայաստանի դեպքում բյուրոն նաև խորհուրդ է տալիս չացելել Լեռնային Ղարաբաղ և շրջակա տարածքներ՝ վերջին պատերազմի պատճառով, և Ադրբեջանի հետ սահմանային գոտիներ, քանի որ ճանապարհի որոշ հատվածներ կարող են հատել միջազգային սահմանները՝ առանց նախազգուշացման: Բացի այդ, ճանապարհները կարող են վերահսկվել անցակետերով կամ փակ լինել ճանապարհորդների համար՝ առանց նախազգուշացման:
Ադրբեջանի դեպքում նույնպես խորհուրդ է տրվում չայցելել Լեռնային Ղարաբաղ և շրջակա տարածքներ, ինչպես նաև Հայաստանի հետ սահմանային գոտիներ՝ նույն պատճառներով: Բացի այդ, Ադրբեջանում կա ահաբեկչական ռիսկ, այդ պատճառով ԱՄՆ քաղաքացիներին խորհուրդ է տրվում խուսափել անհարկի ճանապարհորդությունից դեպի Ադրբեջան-Իրան սահման:
Նշենք, որ ԱՄՆ Բյուրոն դեռ ապրիլից COVID 19-ի պատճառով իր քաղաքացիներին խորհուրդ էր տվել չայցելել նաև Վրաստան և Թուրքիա:
Հետևեք մեզ տելեգրամում
