Մայիսի 25-ին Հավաքական անվտանգության պայմանագրի կազմակերպության (ՀԱՊԿ) միասնական կենտրոնակայանում Ռուսաստանի Դաշնության Դաշնային ժողովի Պետական դումայի պաշտպանության հանձնաժողովի նախագահ Վլադիմիր Շամանովի նախագահությամբ տեղի է ունեցել Խորհրդարանական վեհաժողովի խորհրդին կից ՀԱՊԿ-ի անդամ պետությունների խորհրդարանների պաշտպանության և անվտանգության հանձնաժողովների նախագահների Համակարգող խորհրդակցություն:
Անդրադառնալով հավաքական անվտանգության Կովկասյան տարածաշրջանում ստեղծված իրավիճակին՝ ՀԱՊԿ գլխավոր քարտուղարի տեղակալ Վալերի Սեմերիկովը նշել է, որ Ռուսաստանի, Հայաստանի և Ադրբեջանի ղեկավարների՝ 2020թ. նոյեմբերի 9-ին կնքած ղարաբաղյան հակամարտության գոտում հրադադարի մասին եռակողմ հայտարարությունից հետո այդտեղ իրավիճակն ընդհանուր առմամբ կայունացել է:
«Երկարաժամկետ խաղաղությունն ամրապնդում են ռուս խաղաղապահները և շարունակվող բանակցային գործընթացը»,-ասել է Սեմերիկովը՝ միևնույն ժամանակ նշելով, որ վերջին օրերին հայ-ադրբեջանական սահմանին առաջացած սրացումը պահանջում է հապշտապ միջոցների ձեռնարկում՝ «առաջին հերթին, քաղաքական-դիվանագիտական բնույթի, և Հայաստանի ու Ադրբեջանի միջև պետական սահմանի սահմանազատման և սահմանագծման հարցերի լուծում»:
Հետևեք մեզ տելեգրամում
