«Իսլամական պետություն» ահաբեկչական կազմակերպության նախկին առաջնորդ Աբու Բաքր Ալ-Բաղդադիից հետո ամենաազդեցիկ ղեկավարը, ով ձերբակալվել էր Իրաքի անվտանգության ուժերի կողմից մեկ ամիս առաջ, բացահայտել է այն գաղտնիքներն ու մեթոդները, որոնց օգնությամբ կարողացել են կուտակել միլիարդավոր դոլարներ, գրում է Al Arabiya-ն:
Հաջի Համիդը, ով հայտնի է նաև Սամի Ջասիմ Մուհամմադ Ջաադա Ալ-Ջուբուրի կեղծանունով, խոսել է ԻՊ-ի ֆինանսների կառավարման մեթոդների և տնտեսական կարգավորման մեխանիզմների մասին, հատկապես երբ ստանձնել էր «Բեյթ ալ-Մալի» կառավարումը (բառացի թարգմանությամբ՝ «Գումարների տուն», որը կազմակերպության ֆինանսների կառավարման մարմինն էր):
Նա բացահայտել է, որ ԻՊ-ը Նինվեի գործարարներից և մեծահարուստներից ստանում էր հոնորարներ՝ ամսական 500 հազար դոլարի չափով: Իսկ նրանք, ովքեր հրաժարվել են գումարները տրամադրել, դատապարտվել են մահվան:
Ալ-Ջուբուրին նաև հաստատել է, որ ԻՊ-ը նավթային մաքսանենգության և սև շուկայում դրա վաճառքի միջոցով կուտակել է ավելի քան մեկ միլիարդ դոլար:
Նրա խոսքով՝ 2016 թվականին ֆինանսական պատասխանատուի պաշտոնը ստանձնելու ժամանակ ԻՊ-ի բյուջեն կազմել է 250 միլիոն դոլար և 3 տոննա ոսկի, որոնք մեծամասամբ ստացվել են նավթի արտահանումից, իսկ մյուս մասը՝ մեծահարուստներից և ազդեցիկ գործարարներից առգրավվումից:
Հետևեք մեզ տելեգրամում
