Եվրոպական խորհրդարանի Հարավային Կովկասի պատվիրակության ղեկավար Մարինա Կալյուրանդը, Հայաստանի հարցով զեկուցող Անդրեյ Կովաչովը և Ադրբեջանի հարցով զեկուցող Ժելյանա Ժիվկոն հանդես են եկել համատեղ հայտարարությամբ, որտեղ բացահայտ խոսել են Հայաստանի դեմ Ադրբեջանի սանձազերծած ռազմական ագրեսիայի, Հայաստանի սահմանները խախտելու ու հայ ռազմագերիների մասին, գրում է Sputnik Armenia-ն:
«Մենք լրջորեն անհանգստացած ենք երեկվա ծանր մարտերով, որոնք հետևել են Հայաստանի և Ադրբեջանի սահմանին լարվածության վերջին աճին։ Ադրբեջանի կողմից ենթադրյալ սադրանքներին ի պատասխան ձեռնարկած ռազմական գործողությունը համարվում է անցյալ տարվա նոյեմբերի 9-ի հրադադարի համաձայնագրի ամենավատ խախտումը մինչ օրս՝ թողնելով դեռևս չհաստատված թվով սպանված, վիրավոր և գերի ընկած զինվորներ»,– ասված է հայտարարության մեջ։
Հայտարարության հեղինակները դատապարտում են ապօրինի սահմաններ դնելու ցանկացած փորձ, ինչպիսին արձանագրվել է մայիսի 12-ից հետո` ադրբեջանական զորքերի հայկական տարածք ներխուժումից ի վեր։
«Մենք աջակցում և կոչ ենք անում բացել տնտեսական ու տրանսպորտային կապերը, ինչպես նախատեսված է նոյեմբերի 9-ի զինադադարի հայտարարությամբ, ինչը մեծապես շահավետ կլինի ողջ տարածաշրջանի համար։ Սա ներառում է կապը Ադրբեջանի արևմտյան շրջանների և Նախիջևանի Ինքնավար Հանրապետության միջև։ Հաջողության հասնելու համար կողմերը պետք է հետևեն համաձայնագրի տեքստին և խուսափեն չափազանց ծավալուն մեկնաբանությունից»,– նշում են հայտարարության հեղինակները։
Այդուհանդերձ, նրանք նաև անհանգստություն են հայտնում հայկական քաղաքների ու գյուղերի հետ կապ ապահովող ճանապարհներին ադրբեջանական կողմի առաջացրած խոչընդոտների վերաբերյալ` հավելելով, որ նման վարքագիծը հակասում է եռակողմ հայտարարության ոգուն և անտեղի խոչընդոտում է տեղի քաղաքացիների կյանքը:
ԵԽ ներկայացուցիչները նաև մտահոգություն են հայտնում գերիների վերադարձի վերաբերյալ` փաստելով, որ բազմաթիվ հայ գերիներ դեռ պետք է ազատ արձակվեն։
«Մենք վերահաստատում ենք մեր դիմումը Ադրբեջանի իշխանություններին այս հարցով»,– նշում են նրանք` միաժամանակ հայկական կողմին էլ կոչ անելով փոխանակել ականապատ տարածքների քարտեզները, որպեսզի խաղաղ բնակիչները վերադառնան նախկին հակամարտությունների շրջաններ։
Հետևեք մեզ տելեգրամում
