Իրանի ճանապարհային բեռնափոխադրումների և սպասարկման կազմակերպության միջազգային բեռնափոխադրումների գրասենյակի տնօրեն Ջավադ Հեդայաթին հայտնել է, որ վրացական կողմի հետ հանդիպում է անցկացվել, որի ընթացքում քննարկվել են Պարսից ծոց-Սև ծով միջանցքի գործարկման հարցը, ինչպես նաև երկու երկրների միջև բեռնափոխադրումների հետ կապված խնդիրները, գրում է IRNA-ն:
«Այդ հանդիպմանը քննարկվել են կողմերի տրանսպորտային միջոցների երթևեկության գործընթացին, սահմանային խնդիրներին, Պարսից ծոց-Սև ծով միջանցքի համաձայնագրի կնքումն արագացնելուն, միմյանց նավահանգիստներից օգտվելու եղանակներին, բեռնափոխադրումների ծախսերին առնչվող հարցեր»,- ասել է Հեդայաթին:
Ըստ նրա՝ որոշում է կայացվել երկու երկրների տարածքներում կողմերի տրանսպորտային միջոցների երթևեկության խնդիրները վեր հանելու նպատակով համապատասխան զեկույցներ պատրաստել:
Անդրադառնալով Ադրբեջանի հետ հանդիպումից հետո այս հանդիպման պլանավորման ուղղությամբ գործադրվող ջանքերին՝ Հեդայաթին ասել է, որ իրանական կողմը կարևորում է տարածաշրջանի տարանցման հնարավորությունների ամրապնդումը, միմյանց տարածքով կողմերի փոխադրամիջոցների երթևեկության վերականգնումը, ճանապարհի ու ծախսերի կրճատումը:
Ըստ պաշտոնյայի՝ քննարկվել են նաև Իրանի, Վրաստանի, Հունաստանի, Բուլղարիայի, Հայաստանի և Ադրբեջանի մասնակցությամբ առաջիկա վեցակողմ նիստին առնչվող հարցեր:
Հետևեք մեզ տելեգրամում
