Իսրայելի վարչապետ Նաֆթալի Բեննեթը դեկտեմբերի 12-ին մեկնել է Արաբական Միացյալ Էմիրություններ: Նա առաջին վարչապետն է, ով պաշտոնական այց է կատարել ԱՄԷ:
Հաղորդվում է, որ դեկտեմբերի 13-ին Բեննեթն այցի շրջանակներում հանդիպելու է նաև Աբու Դաբիի թագաժառանգ շեյխ Մուհամմադ բըն Զայեդ Ալ-Նահայանի հետ:
«Երկու երկրների միջև հարաբերությունները բազմազան են, և մենք պետք է շարունակենք ամրապնդել և խորացնել դրանք՝ կառուցելով կայուն խաղաղություն մեր ժողովուրդների միջև»,- հայտարարել է Բեննեթը՝ ԱՄԷ մեկնելուց առաջ:
Ավելի վաղ՝ Բեննեթի այցից մեկ շաբաթ առաջ, Իսրայելի նախագահ Իսահակ Հերցոգը առաջին անգամ հեռախոսազրույց է ունեցել Աբու Դաբիի թագաժառանգի հետ: Երկու առաջնորդները քննարկել են երկկողմ համագործակցությունը՝ խրախուսելու Իսրայելի և ԱՄԷ-ի միջև ազատ առևտրի համաձայնագրի անհրաժեշտությունը:
Նշենք, որ 2020թվականի սեպտեմբերի 15-ին Իսրայելը և ԱՄԷ-ն կարգավորել են դիվանագիտական հարաբերությունները «Աբրահամյան արձանագրությունների» ներքո: Ընթացիկ տարվա հունիսին Իսրայելի արտգործնախարար Յաիր Լապիդն աշխատանքային այցով մեկնել էր ԱՄԷ և մասնակցել էր այդ երկրում Իսրայելի դեսպանատան բացման պաշտոնական արարողությանը:
Հետևեք մեզ տելեգրամում
