Թուրք պաշտոնյաներ են ժամանել Իսրայել՝ երկկողմ հարաբերությունների ջերմացման ֆոնին

Թուրքական բարձրաստիճան պատվիրակությունը Իսրայելի նախագահ Իցխակ Հերցոգի այցին ընդառաջ ժամանել է Իսրայել:

Թուրքական պավիրակության կազմում են Էրդողանի մամուլի խոսնակ Իբրահիմ Քալընը և Թուրքիայի փոխարտգործնախարար Սադաթ Օնալը:

Կողմերը քննարկել են թուրք-իսրայելական հարաբերությունները, որոնք վերջին տասնամյակում լարված էին, սակայն վերջին շրջանում կարգավորման միտումներ են նկատվում:

«Մենք քննարկել ենք քայլերը տարածաշրջանում խաղաղության և կայունության ապահովման համար, ինչպես նաև նախագահ Հերցոգի այցը Անկարա»,- Army Radio-ի հետ զրույցում հայտարարել է Իբրահիմ Քալընը:

Համաձայն Իսրայելի արտգործնախարարության և նախագահի աշխատակազմի տարածած համատեղ հայտարարության՝ Հերցոգը նույնպես ողջունել է թուրք պաշտոնյաներին:

«Թուրքիան և Իսրայելը տարածաշրջանում մեծ ազդեցություն ունեն, ուստի երկուսն էլ համաձայնել են, որ հարաբերությունների վերականգնումը կարող է խթանել տարածաշրջանում կայունությանը»,- նշված է հայտարարության մեջ:

Ավելի վաղ Էրդողանը հայտարարել էր, որ Հերցոգի այցն Անկարա բխում է երկու երկրների շահերից էլ:

Վերջին շրջանում թուրք-իսրայելական հարաբերություններում զգալի ջերմացում է նկատվում: Էրդողանը պարբերաբար երկկողմ համագործակցության վերաբերյալ հայտարարություններ է անում: Երկրները հետ էին կանչել իրենց դեսպաններին 2010 թվականին «Մավի Մարմարա» նավի միջադեպից հետո, որը մարդասիրական օգնություն էր տեղափոխում պաղեստինցիներին: Իսրայելական զորքերը հարձակվել էին նավի վրա՝ թույլ չտալով, որ այն անցնի Գազայի հատված: Նավի ուղևորները փորձել են դիմակայել իսրայելցի զինվորներին: Ի պատասխան՝ զինվորները կրակ են բացել ուղևորների ուղղությամբ, ինչի հետևանքով զոհվել է Թուրքիայի 9 քաղաքացի:

Այս միջադեպից հետո երկկողմ հարաբերությունները դանդաղորեն բարելավվում էին, բայց կրկին խզվեցին 2018 թվականին, երբ Միացյալ Նահանգները իր դեսպանատունը Երուսաղեմ տեղափոխեց: Այս ամենից հետ Թուրքիան ևս մեկ անգամ հետ կանչեց իր դեսպանին Իսրայելից՝ դրդելով Իսրայելին պատասխան քայլեր ձեռնարկել:

Երկկողմ հարաբերությունների լարվածության պատճառներ է Թուրքիայի աջակցությունը «ՀԱՄԱՍ» պաղեստինյան կազմակերպությանը, որին Իսրայելը համարում է ահաբեկչական:

Բացի այդ՝ Իսրայելը Հունաստանի հետ համագործակցում էր նոր գազամուղի կառուցման աշխատանքներում, որով իսրայելական գազը մակատարարվելու էր Եվրոպային: Թուրքիան մշտապես դեմ է եղել այս նախագծին և առաջ է քաշել սեփական տարածքային հավանականությունը: Երբ ԱՄՆ նախագահ Ջո Բայդենի վարչակարգը դադարեցրեց աջակցությունը գազամուղի կառուցմանը, Էրդողանը հայտարարեց, որ Թուրքիան ևս ցանկանում է ներգրավվել՝ ավելացնելով, որ «որոշակի առաջընթաց կա» այս նախագծում: