Սիրիայի արաբական հանրապետությունը լիովին աջակցում է ՌԴ նախագահ Վլադիմիր Պուտինի՝ Դոնեցկի և Լուգանսկի ժողովրդական Հանրապետությունները ճանաչելու որոշմանը: Այս մասին հայտարարել է Սիրիայի արտգործնախարար Ֆեյսալ Միկդադը՝ ելույթ ունենալով «Վալդայ» միջազգային քննարկման հարթակի կազմակերպած համաժողովում։
Նրա խոսքով՝ ՌԴ նախագահ Վլադիմիր Պուտինի այս որոշմամբ «ամրապնդվում է խաղաղությունը», միջազգային իրավունքը և ՄԱԿ-ի կանոնադրությունը:
«Մենք մեր լիակատար համերաշխությունն ենք հայտնում Դոնեցկի և Լուգանսկի հանրապետություններին։ Կարծում ենք, որ ստեղծված պայմանները կնպաստեն մեր համագործակցության ամրապնդմանը»,- հայտարարել է սիրիացի դիվանագետը:
Միկդադը հայտարարել է նաև, որ Դամասկոսը շուտով կարող է ճանաչել Լուգանսկի և Դոնեցկի ժողովրդական հանրապետությունները: Նա հիշեցրել է, որ հանրապետությունների ճանաչման գործընթացը պետք է իրականացվի խորհրդարանի կողմից՝ հաստատման ընթացակարգով։ Իսկ ճշտող հարցին՝ «ե՞րբ», նա պատասխանեց՝ «որքան հնարավոր է շուտ»։
Նրա խոսքով՝ արևմտյան երկրների քաղաքականությանը միայն այս կերպ կարելի է պատասխանել:
«Արևմտյան երկրները աջակցում են ահաբեկչությանը, օգտագործում են ուժային քաղաքականությունն այնտեղ, որտեղ ուզում են, իսկ որոշ դեպքերում ուժային քաղաքականության փոխարեն օգտագործում են այսպես կոչված փափուկ ուժ՝ աշխարհում իրավիճակը փոխելու՝ ի շահ իրենց գերիշխանության»,- ընդգծել է Միկդադը:
Նա նաև նշել է, որ երկուշաբթի Մոսկվայում կայացած բանակցությունների ընթացքում այդ հարցը Ռուսաստանի արտգործնախարար Սերգեյ Լավրովի հետ քննարկել է, սակայն դրանք տեղի էին ունեցել մինչ Պուտինի հայտարարությունը՝ ԿԺԴՀ-ի և ԼԺՀ-ի ճանաչման վերաբերյալ:
Հետևեք մեզ տելեգրամում
