Իսրայելն Ուկրաինայում հավատարմագրված իր դիվանագիտական ներկայացուցչությունը Կիևից տեղափոխելու է Լվով:
«Կիևում Իսրայելի դեսպանատան գործունեությունը տեղափոխվում է Լվով: Ելնելով այսօր ԱԳՆ-ում տեղի ունեցած իրավիճակի գնահատականից և մի շարք օտարերկրյա աղբյուրների հետ խորհրդակցություններից՝ արտգործնախարար Յաիր Լապիդը որոշում է կայացրել հանձնարարել Ուկրաինայում Իսրայելի դեսպանատան աշխատակազմին տեղափոխվել հյուպատոսարան, որը գործում է Ուկրաինայի Լվով քաղաքում»,- ասվում է Իսրայելի ԱԳՆ-ի տարածած հաղորդագրության մեջ։
Հաղորդագրությամբ կրկին կոչ է արվել Իսրայելի քաղաքացիներին «անհապաղ լքել Ուկրաինան» և վերադառնալ հայրենիք:
Նշենք, որ վերջին շրջանում ռուս-ուկրաինական լարվածության աննախադեպ աճ է նկատվում: Կողմերն օրեցօր ավելացնում են ռազմական հռետորաբանությունը: Իսկ երեկ Ռուսաստանի նախագահ Վլադիմիր Պուտինը հրամանագիր է ստորագրել, որով ճանաչել է Լուգանսկի և Դոնեցկի ժողովրդական հանրապետությունները: Դամասկոսը ողջունել է այս որոշումը և հայտարարել, որ Սիրիան «որքան հնարավոր է շուտ» ճանաչելու է այս հանրապետությունները:
Հետևեք մեզ տելեգրամում
