Human Rights Watch (HRW) միջազգային իրավապաշտպան կազմակերպությունը և Եվրամիությունը մտահոգություն են հայտնել Արցախում գազի մատակարարումը կրկին դադարեցնելու խնդրի առնչությամբ՝ կոչ անելով թույլատրել գազամատակարարումը:
HRW-ի Եվրոպայի և Կենտրոնական Ասիայի բաժնի տնօրեն Գիորգի Գոգիան «Twitter»-ում նշել է, որ երկու շաբաթվա ընթացքում սառնամանիքի պայմաններում Լեռնային Ղարաբաղի բնակիչները 2-րդ անգամ մնացել են առանց ջեռուցման, որովհետև գազատարի մի հատվածն անցնում է Ադրբեջանի կողմից վերահսկվող տարածքով:
«Գազի անջատումն անդրադառնում է նաև ուսումնական հաստատությունների՝ մանկապարտեզների և դպրոցների գործունեության վրա։ Դրանք մնում են փակ, քանի որ չեն ջեռուցվում: Շտապ քայլեր են անհրաժեշտ հետագա հումանիտար ճգնաժամից խուսափելու համար»,-նշել է նա:
ԵՄ արտաքին հարցերով գլխավոր խոսնակ Պիտեր Ստանոն նույնպես կոչ է արել անմիջապես թույլատրել գազամատակարարումը՝ հատկապես եղանակի ներկայիս պայմաններում:
«ԵՄ-ն մտահոգված է Ստեփանակերտի գազամատակարարման վերստին անջատմամբ: Շտապ անհրաժեշտ է վերականգնել մատակարարումը տեղի տուժած բնակչությանը»,- «Twitter»-ի իր միկրոբլոկում գրել է Ստանոն:
Հետևեք մեզ տելեգրամում
