ՄԱԿ-ում ԱՄԷ-ի ներկայացուցիչ Լանա Զաքի Նուսսեյբահն ընդգծել է, որ Սիրիայի կայունությունն արաբական աշխարհի անվտանգության կարևորագույն սյուներից է:
Նրա խոսքով՝ ԱՄԷ-ն մերժում է Սիրիայի ներքին գործերին երրորդ պետության ցանկացած միջամտություն:
Էմիրաթցի ներկայացուցիչն ավելացրել է, որ թեև ԱՄԷ-ն կոչ է անում ուժեղացնել արաբական աշխարհի դերը սիրիական ճգնաժամին լուծում գտնելու ջանքերում ՝ միևնույն ժամանակ մերժում է «արտաքին միջամտությունը»՝ ընդգծելով «Սիրիայի ինքնիշխանությունը, անկախությունը և տարածքային ամբողջականությունը հարգելու անհրաժեշտությունը»։
Նշենք, որ օրեր առաջ Սիրիայի նախագահ Բաշար Ալ-Ասադը 12-ամյա դադարից հետո պաշտոնական առաջին այցով մեկնել էր Արաբական Միացյալ Էմիրություններ և հանդիպել ԱՄԷ-ի փոխնախագահ, վարչապետ և Դուբայի կառավարիչ շեյխ Մուհամմադ բըն Ռաշիդ Ալ-Մաքթումի հետ, ով ընդգծել է, որ ԱՄԷ-ն ցանկանում է կառուցողական համագործակցության նոր ուղիներ բացահայտել։
Ուշագրավ է, որ երեկ Իրանի արտգործնախարարը պաշտոնական այցով մեկնել էր Դամասկոս, որտեղ հանդիպել էր սիրիացի իր պաշտոնակցի և նախագահ Բաշար Ալ-Ասադի հետ: Աբդոլլահիանը ողջունել էր Սիրիայի և արաբական որոշ երկրների միջև հարաբերությունների կարգավորումը:
Հետևեք մեզ տելեգրամում
