Քաղաքական մի շարք ուժերի բոյկոտի պատճառով Իրաքի խորհրդարանը մարտի 26-ին կայացած արտահերթ նիստում կրկին չկարողացավ նոր նախագահ ընտրել։
329 պատգամավորներից ներկա էին միայն 202-ը, ինչը բավարար չէ նոր նախագահ ընտրելու համար։ Ըստ Իրաքի սահմանադրության՝ նախագահի ընտրության համար անհրաժեշտ է Ներկայացուցիչների պալատի 329 անդամների երկու երրորդի քվեարկությունը։ Մինչդեռ 126 օրենսդիր բոյկոտել էր նիստը:
Մուկթադա Սադրը, ում գլխավորած դաշինքը խորհրդարանում զբաղեցնում է ամենաշատ տեղերը, հույս ուներ, որ խորհրդարանը կընտրի Ռեբեր Ահմեդին՝ քրդական հետախուզության վետերան և Իրաքյան Քուրդիստանի ներքին գործերի գործող նախարարին:
Նշենք, որ ավելի վաղ խորհրդարանի նախագահ Մուհամմադ Ալ-Հալբուսին հայտնել էր, որ երկրի օրենսդիր մարմինը նախագահ է ընտրելու մարտի 26-ին։ Հրապարակված նոր ցանկի համաձայն՝ նախագահի պաշտոնի համար պայքարում էին 40 թեկնածուներ: Սակայն հիմնական հավակնորդները երկուսն են՝ երկրի գործող ղեկավար Բարհամ Սալիհը, ում թեկնածությունն առաջադրել է «Քուրդիստանի հայրենասիրական միությունը», և Ռեբեր Ահմեդը, ով առաջադրվել է «Քուրդիստանի դեմոկրատական կուսակցության» կողմից։
Հարկ է նշել, որ քաղաքական ճգնաժամն ավելի է խորանում Իրաքում։ Այսօր իրաքյանԶԼՄ-ները հայտնել են, որ մի շարք ցուցարարներ գրոհել են «Քուրդիստանի դեմոկրատական կուսակցության» շտաբը, ներս են մտել և հրդեհ առաջացրել։ Ըստ ԶԼՄ-ների՝ Իրաքի «անվտանգության ուժերը միջամտել են՝ փորձելով հանգցնել շտաբի ներսում բռնկված հրդեհը»։
Հետևեք մեզ տելեգրամում
