Լիբանանի նախագահը ծովային վիճելի տարածքում Իսրայելի գործողությունները «թշնամական» է որակել

136

Կիրակի Լիբանանի նախագահ Միշել Աունը նախազգուշացրել է Իսրայելին Միջերկրական ծովի Քարիշ օֆշորում բնական գազի հանքավայրում հետազոտական աշխատանքներ իրականացնելու համար, քանի որ գազ հորատող նավ էր ժամանել այդ վայր:

Աունի գրասենյակը հայտնել է, որ նախագահն այդ հարցը քննարկել է վարչապետի պարտականություններն իրականացնող Նաջիբ Միկաթիի հետ և խնդրել է իրեն պարբերաբար տեղեկացնել հորատող նավի գործունեության մասին, որը շահագործում է հունական «Energean» էներգետիկ ընկերությունը:

Լիբանանի նախագահը նաև մատնանշել է ԱՄՆ-ի միջնորդությամբ շարունակվող բանակցություններն՝ ուղղված Լիբանանի և Իսրայելի միջև ծովային սահմանի վեճի կարգավորմանը:

«Ցանկացած գործողություն կամ ակտիվություն վիճելի տարածքում սադրանք և թշնամական գործողություն է»,- նշված է նախագահականի տարածած հայտարարության մեջ:

Ըստ Reuters-ի՝ Միկաթին Իսրայելին մեղադրել է «Լիբանանի ծովային հարստության դեմ ոտնձգություն կատարելու և վիճելի տարածքում կատարված փաստի պարտադրման մեջ»: Նա Իսրայելի այս քայլն անվանել է «չափազանց վտանգավոր»:

Նշենք, որ Իսրայելի և Լիբանանի միջև ԱՄՆ-ի միջնորդությամբ բանակցություններ են ընթանում ծովային սահմանազատման շուրջ: Սակայն 860 քառակուսի կիլոմետր ծովային վիճելի տարածք կա, որը հարուստ է բնական գազի պաշարներով: