Իրանը ՄԱԳԱՏԷ-ի 2 տեսախցիկներ է անջատելու իր միջուկային օբյեկտներից մեկում. ԶԼՄ

119

Իրանի ատոմային էներգիայի կազմակերպությունը հայտարարել է, որ իր միջուկային օբյեկտներից մեկում այսօր անջատելու է ՄԱԳԱՏԷ-ի հետ Լրացուցիչ արձանագրության շրջանակներում տեղակայված 2 տեսախցիկները: Տեղեկությունը հայտնել է tasnimnews լրատվամիջոցը:

Հաղորդվում է, որ ՄԱԳԱՏԷ-ի տեսախցիկների 80 տոկոսից ավելին, որոնք տեղադրվել են Երաշխիքների կիրառման համաձայնագրի շրջանակներում, շարունակելու են գործել:

Նշենք, որ 2021թ. փետրվարին խորհրդարանի ընդունած օրենքի համաձայն՝ Իրանի ատոմային էներգիայի կազմակերպությունը դադարեցրել էր ՄԱԳԱՏԷ-ի Լրացուցիչ արձանագրությամբ նախատեսված տեսչական ստուգումները:
Սակայն ՄԱԳԱՏԷ-ի հետ պայմանավորվածություն էր ձեռք բերվել,որ Լրացուցիչ արձանագրության կամավոր կատարումը դադարեցնելուց հետո Իրանը 3 ամիս տեսագրելու է միջուկային օբյեկտներում իր գործողությունները: Եթե այդ ընթացքում Իրանի նկատմամբ պատժամիջոցները չեղարկվեին, Թեհրանն այդ տեղեկությունները փոխանցելու էր ՄԱԳԱՏԷ-ին, հակառակ դեպքում՝ ինֆորմացիան շարունակելու էր փակ մնալ: 3 ամսյա ժամկետը մի քանի անգամ երկարաձգվել էր: