Իրանի նախագահ Էբրահիմ Ռայիսին և ՌԴ նախագահ Վլադիմիր Պուտինը հեռախոսազրույց են ունեցել: Այս մասին տեղեկություն է տարածել Իրանի նախագահական գրասենյակը:
Ռայիսին ընդգծել է, որ տարածաշրջանային և միջազգային մակարդակներում հավաքական շահերի ապահովման նպատակով անկախ երկրների համագործակցությունը կչեզոքացնի արևմտյան երկրների անօրինական ճնշումները։
Հույս հայտնելով, որ բախումներն Ուկրաինայում կավարտվեն որքան հնարավոր է շուտ, Ռայիսին ընդգծել է այդ հարցում դիվանագիտական լուծման կարևորությունը և հայտարարել, որ Իրանը պատրաստ է օգտագործել իր հնարավորությունները՝ աջակցելու խնդրի դիվանագիտական կարգավորմանը։
Անդրադառնալով միջուկային բանակցություններին՝ Իրանի նախագահը նշել է, որ Թեհրանն իր պարտավորությունները կատարել է և այժմ ժամանակն է, որ ԱՄՆ-ն «որոշում կայացնի»:
Կողմերը նաև ընդգծել են ահաբեկչության դեմ պայքարում, Արևմտյան Ասիայում ու Կովկասում համագործակցության անհրաժեշտությունը:
Հետևեք մեզ տելեգրամում
