Վերջին տարում Իսրայելի և Թուրքիայի հարաբերություններում մեծ առաջընթաց է գրանցվել. Լապիդ

203

Իսրայելի արտգործնախարար Յաիր Լապիդը ողջունել է անվտանգության ոլորտում Թուրքիայի հետ համագործակցությունը՝ օգնելով կանխել իսրայելցիների առևանգման և սպանության՝ Իրանի փորձերը: Այս մասին Լապիդը հայտարարել է Անկարա կատարած այցի ընթացքում թուրք պաշտոնակից Մևլութ Չավուշօղլուի  հետ հանդիպման ժամանակ:

Անկարայում կայացած բանակցություններից հետո Լապիդն ասել է, թե  Իսրայելը վստահ է, որ Անկարան «գիտի, թե ինչպես պատասխանել իրանցիներին՝ թուրքական հողում իսրայելցի զբոսաշրջիկներին վնասելու շարունակական փորձերից հետո»:

«Իսրայելի քաղաքացիների կյանքը փրկվել է Իսրայելի և Թուրքիայի միջև անվտանգության և դիվանագիտական համագործակցության շնորհիվ»,- հայտարարել է Լապիդը:

Հաղորդվում է, որ Անկարայում գտնվելու ժամանակ Լապիդը հանդիպել է նաև Թուրքիայի Ազգային հետախուզական կազմակերպության ղեկավար Հաքան Ֆիդանի հետ: Ըստ իսրայելական ԶԼՄ-ների հաղորդագրությունների՝  նրանք քննարկել են Իրանի հարձակման ենթադրյալ ծրագրերը խափանելու ջանքերը:

Ավելի վաղ թուրքական ԶԼՄ-ները հայտնել էին, որ երկրի անվտանգության ուժերը ձերբակալել են մի քանի մարդկանց, ովքեր իբր աշխատում էին իրանական հետախուզական խմբում, որն էլ ծրագրել էր սպանել կամ առևանգել իսրայելցի զբոսաշրջիկներին Ստամբուլում:

«Վերջին տարում Իսրայելի և Թուրքիայի հարաբերություններում մեծ առաջընթաց է գրանցվել»,- հավելել է Լապիդը։

«Մենք սկսեցինք քննարկումներ անցկացնել մոտ ապագայում դեսպանների վերադարձի, տնտեսական և քաղաքական երկխոսության բարելավման շուրջ»։

Իր հերթին Չավուշօղլուն Լապիդին հաջողություն է մաղթել առաջիկայում վարչապետի պաշտոնը ստանձնելու գործում:

Հիշեցնենք, որ Իսրայելի խորհրդարանը՝ Կնեսետը լուծարվել է: Իսկ երկրի արտգործնախարար Յաիր Լապիդը կփոխարինի վարչապետ Նաֆթալի Բեննեթին՝ ժամանակավոր կառավարության գլխավորությամբ: