Երեկ հարյուրավոր իրաքցի ցուցարարներ ներխուժել էին երկրի խորհրդարանի շենք:
Նրանք բողոքում էին Մուհամմադ Ալ-Սուդանի՝ որպես «Կոորդինացիոն շրջանակ» դաշինքի պաշտոնական թեկնածու ընտրվելու դեմ: Դաշինիքի կազմում են Իրանի կողմից աջակցություն վայելող շիա կուսակցությունները և նրանց աջակիցները:
Ցուցարարները մեծամասամբ Իրաքի ազդեցիկ շիա հոգևորական Մուկթադա ալ-Սադրի հետևորդներն են: Նրանց հեռացան խորհրդարանի շենքից միայն այն բանից հետո, երբ Ալ-Սադրը Twitter-ում հայտարարություն տարածեց, ըստ որի՝ իրենց ուղերձը ստացվել է, և պետք է «անվտանգ վերադառնալ իրենց տները»:
Al Arabiya-ի տեղեկացմամբ՝ ցուցարարների հեռանալուց հետո Բաղդադի կենտրոնում գտնվող «Կանաչ գոտում» անվտանգության ուժեր են տեղակայվել:
Իր հերթին, Իրաքում ՄԱԿ-ի ներկայացուցչությունը կոչ է արել ցուցարարներին պահպանել պետական և մասնավոր սեփականությունը:
Հիշեցնենք, որ Մուկթադա Ալ-Սադրի գլխավորած «Ալ-Սադր շարժում» կուսակցությունն Իրաքի ընտրություններում ամենաշատ ձայներ հավաքած կուսակցությունն է: Թեև Իրաքում ընտրություններն անցկացվել էին դեռևս նախորդ տարի հոկտեմբերին, մինչ օրս երկրում չի ձևավորվել կառավարություն՝ կուսակցությունների միջև առկա տարաձայնությունների պատճառով:
Հետևեք մեզ տելեգրամում
