«Իրանի և Ադրբեջանի միջև լարվածությունը մի քանի ամսվա պատմություն չէ, այլ ձգվում է տարիներ». թելեգրամյան ալիք

Իրանի և Ադրբեջանի միջև լարվածությունը մի քանի ամսվա պատմություն չէ, այլ տարիներ է ձգվում։ Նման տեսակետ է ներկայացվել «Ադրբեջանում տեղակայված Մոսադի բազայի վրա Իրանի հարձակման հավանականությունը» վերնագրով տեսանյութում՝ տեղադրված իրանական SEPAHCYBERY թելեգրամյան հայտնի ալիքում:

Ըստ թելեգրամյան ալիքի՝ 44-օրյա պատերազմի ժամանակ Իսրայելը և Թուրքիան շատ մեծ ռազմական աջակցություն են ցուցաբերել Ադրբեջանին, որի պատճառով մեծացել է Ադրբեջանում «Սիոնիստական ռեժիմի» ազդեցությունը, ինչպես նաև Իրանին հարվածելու հնարավորությունը: Այս համատեքստում ընթերցողներին հիշեցրել են Ադրբեջանում Իսրայելի դեսպանի հայտարարութունն առ այն, որ «Ադրբեջանի դրոշը նույն Իսրայելի դրոշն է»։

Այս համատեքստում հիշեցվել է, որ Իրանը չի հանդուրժելու «իսրայելական լրտեսների ներկայությունն» իր սահմանների մոտ:

Տեսանյութում անդրադարձ է կատարվել Սիրիայում, Իրաքում և Պաղեստինում տեղի ունեցող ռազմական գործողությունների ժամանակ իսրայելական բանակի կողմից իրանցի զինծառայողների սպանությանը:

Առանձնացվել է նաև Ադրբեջանում հավատացյալների ձերբակալությունների հանգամանքը: Մատնանշվել է, որ ձերբակալվում են Իրանի Ղոմ քաղաքում ուսանած Ադրբեջանի քաղաքացիները և «Հոսեյինե» շարժման անդամները, ովքեր Սիրայում մարտնչելուց հետո վերադարձել էին իրենց հայրենիք։