Ֆուտբոլի աշխարհի առաջնության մրցաշարի մեկնարկին երկու ամսից էլ քիչ ժամանակ է մնացել:
Ֆուտբոլի խոշորագույն մրցաշարը մեկնարկելու է նոյեմբերի 20-ին: Սա առաջին անգամն է, երբ մրցաշարը հյուրընկալելու է մերձավորարևելյան երկիր՝ Կատարը: Երկրպագուներն աշխարհի տարբեր ծայրերից մեկնելու են Կատար՝ մասնակցելու մեկամսյա մրցաշարին:
Սակայն կան հստակ կանոններ, որոնց ֆուտբոլասերները պետք է հետևեն մրցաշարի ընթացքում:
COVID-19
Աշխարհի գավաթ 2022-ի խաղերը դիտելու համար անհրաժեշտ է Կատար մուտք գործել՝ ունենալով COVID-19-ի բացասական թեստ: Այս կանոնը կիրառվում է՝ անկախ նրանից այցելուները պատվաստված են, թե ոչ։
6 տարեկանից բարձր երկրպագուները պետք է բացասական թեստը կատարեն Կատար մեկնելուց 48 ժամ առաջ: Կատարում հասարակական տրանսպորտով երթևեկելիս երկրպագուները պետք է նաև դիմակ կրեն:
Առողջական ապահովագրություն
Կատար այցելուները պետք է վճարեն մոտ 13 դոլար առողջական ապահովագրության համար: Վիզան երկարաձգելու դեպքում ապահովագրության վճարը դարձյալ 13 դոլար է արժենալու:
Հայյա քարտեր
Յուրաքանչյուր ոք, ով ցանկանում է երկիր մուտք գործել 2022 թվականի նոյեմբերի 1-ից հետո, պետք է դիմի Հայյա քարտի համար: Դա անհատականացված փաստաթուղթ է, որը տրվելու է երկրպագուներին և պահանջվելու է նրանցից խաղերին ներկա գտնվելու համար:
Այս քարտերով երկրպագուները Կատարում հնարավորություն են ունենալու անվճար օգտվել հասարակական տրանսպորտից՝ այդ թվում մետրոյից և ավտոբուսներից:
Սոցիալական կանոններ
Կատարում երկրպագուները կարող են ալկոհոլային ըմպելիքներ գնել «լիցենզավորված բարերից և ռեստորաններից»:Կառավարությունը վերջերս հայտարարել է, որ ալկոհոլային ըմպելիքների գնման որոշ սահմանափակումներ մեղմացվել են մրցաշարի ընթացքում: Մասնավորապես, գարեջուրը հասանելի կլինի երեկոյան ժամը 18.30-ից հետ՝ երկրպագուների շրջանում և 8 մարզադաշտերում ֆուտբոլային հանդիպումներից առաջ և հետո:
Խաղի տոմսերը ներառում են շամպայն, գինի, կոնյակ և գարեջուր: Դրանք վաճառվում են երկրպագուներին դեռևս 2021 թվականի փետրվարից՝ որպես «պրեմիում խմիչքներ»: Իսկ հասարակական վայրերում ալկոհոլային ըմպելիքներ օգտագործելը դեռևս արգելված է:
Հագուստ
Երկրպագուներին խորհուրդ է տրվել հագնվել «համեստ»՝ ուսերը ծածկած։ Խորհուրդ չի տրվում կրել շորտեր կամ անթև վերնաշապիկներ:
Ծխելը
Թեև Կատարում ծխախոտի օգտագործումն օրինական է, սակայն արգելված է հանրային բոլոր վայրերում՝ ներառյալ թանգարաններում, սպորտային ակումբներում, առևտրի կենտրոններում և ռեստորաններում: Խախտողները տուգանվելու են:
Էլեկտրոնային ծխախոտների ներկրումը, գնումը և օգտագործումը Կատարում արգելվել է դեռևս 2014 թվականից, իսկ իրավախախտները պատժվելու են մինչև երեք ամիս ազատազրկմամբ և մոտ 2750 ԱՄՆ դոլարի տուգանքով:
Նշենք, որ ֆուտբոլի ամենամեծ մրցաշարը մեկնարկելու է Դոհայի Ալ-Բեյթ մարզադաշտում՝ Կատարի և Էկվադորի հավաքականների միջև խաղով:
Ուշագրավ է, որ մինչ օրս վաճառվել է ավելի քան 2 միլիոն տոմս:
Հետևեք մեզ տելեգրամում
