Ադրբեջանը Իսրայելի կարևոր գործընկերն է: Այս մասին հայտարարել է Իսրայելի վարչապետի պաշտոնակատար Յաիր Լապիդը՝ մեկնաբանելով Թել Ավիվում Ադրբեջանի դեսպանության բացման որոշումը:
Ինչպես տեղեկացնում են իսրայելական ԶԼՄ-ները, Լապիդը բարձր է գնահատել այս որոշումն՝ ընդգծելով, որ Ադրբեջանում ապրում է հրեական ամենամեծ համայնքներից մեկը:
«Դեսպանություն բացելու որոշումը արտացոլում է մեր երկրների հարաբերությունների խորությունը։ Այս քայլը մուսուլմանական աշխարհի հետ դիվանագիտական ամուր կամուրջներ կառուցելու Իսրայելի կառավարության ջանքերի արդյունքն է»,- հավելել է Լապիդը։
Նշենք, որ Բաքվում դեռևս 1993 թվականից գործում է Իսրայելի դեսպանատունը: Ադրբեջանը Թել Ավիվում միայն 2021 թվականի հունիսին է առևտրային գրասենյակ բացել, իսկ սույն թվականին՝ տուրիստական գրասենյակ:
Հարկ է նշել, որ վերջերս Իսրայելի պաշտպանության նախարար Բեննի Գանցն այցելել էր Բաքու: ԶԼՄ-ների պնդմամբ՝ Ադրբեջանի այս որոշումն արտացոլում է Իսրայելի հետ նրա սերտ կապերը, մասնավորապես անվտանգության և առևտրային ոլորտներում, ինչպես նաև Իրանի հետ լարված հարաբերությունները:
Մասնավորապես JPost-ը, հղում կատարելով արտասահմանյան ԶԼՄ-ներին, նշել է, որ Իսրայելն է Բաքվին անօդաչու թռչող սարքեր մատակարարել, որոնք օգտագործվել են Հայաստանի դեմ պատերազմում: Օրինակ՝ Ստոկհոլմի Խաղաղության միջազգային հետազոտությունների ինստիտուտը պարզել է, որ 2016-2020 թվականներին Ադրբեջանի սպառազինության ներմուծման 69%-ը կատարվել է Իսրայելից, ինչը կազմում է այդ նույն ժամանակահատվածում Իսրայելի զենքի արտահանման 17%-ը։ Իսկ Իսրայել ներկրվող նավթի մոտ 40%-ը գալիս է Ադրբեջանից։
Հետևեք մեզ տելեգրամում
