Ֆինլանդիան Եվրամիությանը հինգ առաջարկ է ներկայացրել՝ կտրուկ սահմանափակելու Ռուսաստանի քաղաքացիների մուտքն ու տեղաշարժը միության տարածքում։ Այդ մասին հայտնել է «Kyiv Independen»-ը։
Ֆինլանդիայի արտգործնախարար Էլինա Վալտոնենը կոչ է արել դադարեցնել ռուսաստանցիներին Շենգենյան վիզաների տրամադրումը ոչ կարևոր ուղևորությունների, այդ թվում՝ զբոսաշրջության համար։ Նա նաև առաջարկել է պարտադիր վիզային արգելք սահմանել Ռուսաստանի նախագահ Վլադիմիր Պուտինի մերձավոր շրջապատի, ԵՄ պատժամիջոցների տակ գտնվող անձանց ու կազմակերպությունների, ինչպես նաև Ռուսաստանի իշխանությունների հետ սերտ կապեր ունեցող մարզիկների և մարզական թիմերի անդամների նկատմամբ։
Առաջարկների թվում է նաև ԵՄ մուտքի վիզաների արգելքը Ռուսաստանի նախկին զինծառայողների համար։ Բացի այդ, Ֆինլանդիան Եվրահանձնաժողովին կոչ է արել փոփոխել վիզայի տրամդրման օրենսգիրքը՝ երրորդ երկրների հետ հարաբերությունների կտրուկ վատթարացման դեպքում վիզային սահմանափակումներն արագ և միասնական կիրառելու հնարավորություն ստեղծելու համար։
Վալտոնենը նշել է, որ Ռուսաստանի շարունակվող ագրեսիան պետք է հանգեցնի երկրի ավելի մեծ մեկուսացման։ Ըստ պարբերականի՝ Եվրահանձնաժողովը հունվարին նախատեսում է ներկայացնել վիզաների մասին նոր օրենսդրական առաջարկ։
Հետևեք մեզ տելեգրամում
