Թուրքիայի արտգործնախարար Մևլութ Չավուշօղլուն հայտարարել է, որ հնարավոր է Անկարան շուտով Կահիրեում դեսպան նշանակի: Այս մասին նա ասել է Anadolu գործակալության մամուլի ասուլիսում:
Չավուշօղլուն նաև հավելել է, որ հնարավոր է առաջիկա ամիսներին Եգիպտոսի և Թուրքիայի փոխարտգործնախարարները քաղաքական քննարկումներ սկսեն:
Ավելի վաղ հաղորդել էինք, որ Թուրքիայի նախագահ Ռեջեփ Թայիփ Էրդողանը և Եգիպտոսի նախագահ Աբդել Ֆաթահ Ալ-Սիսին հանդիպել էին Կատարում Ֆուտբոլի աշխարհի առաջնության բացման արարողության շրջանակներում:
Հանդիպումից մեկ օր անց Եգիպտոսի նախագահի գրասենյակը հայտարարել է երկու երկրների միջև նոր, բարելավված, դիվանագիտական հարաբերությունների «սկիզբը»։
Նախագահների ձեռքսեղմման լուսանկարը մեծ տարածում էր գտել համացանցում: Նշենք, որ Էրդողանի և Սիսիիի հարաբերությունները լարվել են դեռևս 2013 թվականին Եգիպտոսի նախկին նախագահ Մոհամմադ Մուրսիի պաշտոնանկությունից հետո:
Մերձավոր Արևելքի մի շարք երկրներում այսպես կոչված 2011 թվականի արաբական գարնանից հետո Ստամբուլը ապաստան դարձավ իսլամիստ ընդդիմադիր ակտիվիստների համար, հատկապես «Մուսուլման եղբայրների» հետ կապ ունեցող եգիպտացիների համար:
Հետևեք մեզ տելեգրամում
