Երուսաղեմի Հին քաղաքի քրիստոնեական փոքրաթիվ համայնքը հայտնել է, որ մի քանի շաբաթ շարունակ ճնշում է զգում հրեա ծայրահեղականների կողմից աճող հետապնդումների և ահաբեկման պատճառով:
Ամսվա սկզբին տղամարդը, ով հետագայում ճանաչվեց որպես հրեա ծայրահեղական, վանդալիզմի էր ենթարկել Հիսուս Քրիստոսի արձանը: Ավելի ուշ նա կալանավորվել էր:
«Վերջին երկու ամսվա ընթացքում, ես կասեի, որ նոր կառավարության ձևավորումից ի վեր նման հարձակումները շատ-շատ սովորական են դառնում»,- Հին քաղաքում ռեստորանի սեփականատեր Միրան Գրիգորյանի խոսքերը փոխանցում է Al Arabiya-ն: «Եվ խնդիրն այն է, որ մենք զգում ենք, որ ոչինչ չենք կարող անել դրա դեմ»:
Al Arabiya-ն հիշեցնում է, որ նմանատիպ այլ դեպքեր էլ են գրանցել: Մասնավորապես, հունվարի սկզբին հայկական Սուրբ Հակոբ եկեղեցու պատերին եբրայերեն «Մա՛հ հայերին» և «Մա՛հ քրիստոնյաներին» բովանդակության գրություններ էին արվել:
Միջադեպերի առնչությամբ պաշտոնական մեկնաբանությունները բացակայում են:
«Երբ կառավարության կողմից կոշտ արձագանք չկա, դա ոչ միայն խրախուսում է այս մարդկանց նման վարվելակերպը, այլև մեզ տալիս է այն զգացողությունը, թե կառավարությունն ուզում է քրիստոնյա փոքրամասնությունների հետ այդպես վարվել»,- ասել է Երուսաղեմի Հայոց պատրիարքարանի դիվանապետ Հայր Աղան Գոգչյանը:
Հետևեք մեզ տելեգրամում
