Թեհրան-Ռիադ հարաբերությունների կարգավորման գործընթացում Չինաստանի միջնորդությունը վկայում է տարածաշրջանում աշխարհաքաղաքական ազդեցության հավասարակշռության փոփոխության մասին: Նման տեսակետ է հայտնել արաբագետ, տարածաշրջանային հարցերով փորձագետ Արմեն Պետրոսյանը՝ մեկնաբանելով իրանա-սաուդական հաշտեցումը:
Փորձագետը հիշեցրել է, որ Իրան-Սաուդյան Արաբիա հարաբերությունների կարգավորման գործընթացում բարի ծառայություններ էր իրականացնում Բաղդադը, մինչդեռ հանգուցալուծումը տեղի ունեցավ Պեկինում:
Պետրոսյանի խոսքով՝ այս գործընթացը նոր աշխարհակարգի ձևավորման համատեքստում է, երբ Մեձավոր Արևելքում առավել ազդեցություն ունեցած Վաշինգտոնի և Մոսկվայի՝ Արևելյան Եվրոպայում ընթացող դիմակայության պայմաններում իրավիճակից օգտվում է նրանց մրցակիցը:
Փորձագետը հավելել է, որ երկկողմ հարաբերությունների կարգավորումը դեռևս չի վկայում տարածաշրջանային լրջագույն մրցակիցների միջև բարեկամության մասին։ Փոխարենն այս գործընթացը կարող է էականորեն ազդել Մերձավոր Արևելքի անվտանգային միջավայրի վրա՝ եմենական հիմնախնդրից, Բահրեյնից, մինչև Սիրիա, Լիբանան և այլն, որտեղ Թեհրանն ու Ռիադը իրարամերժ դիրքորոշումներ են ունեցել՝ վարելով միջնորդավորված հիբրիդային պատերազմներ։
Պետրոսյանն ուշադրություն է հրավիրել այն հանգամանքի վրա, որը խոսում է Սաուդյան Արաբիայի՝ որպես տարածաշրջանում առավել ինքնուրույն, Վաշինգտոնի ազդեցությունն աստիճանաբար թոթափոխ դերակատարի դիրքավորման մասին, որը համաշխարհային էներգետիկ ոլորտից բացի իր «բնավորությունն է ցույց» տալիս նաև տարածաշրջանի անվտանգության բնագավառում։
Հիշեցնենք, որ օրեր առաջ՝ մարտի 10-ին Պեկինում Չինաստանի միջնորդությամբ Իրանի և Սաուդյան Արաբիայի միջև ստորագրվել է հայտարարություն՝ դիվանագիտական հարաբերությունները վերականգնելու և դեսպանատների աշխատանքը վերագործարկելու վերաբերյալ։
Հետևեք մեզ տելեգրամում
