Սաուդյան Արաբիայի արտգործնախարար Ֆայսալ բին Ֆարհանը երեկ ժամանել է Սիրիա և հանդիպել նախագահ Բաշար ալ-Ասադի հետ:
Սաուդյան Արաբիայի ԱԳՆ-ի տարածած հայտարարության համաձայն՝ «Ֆարհանի այցը Դամասկոս գտնվում է սիրիական ճգնաժամին քաղաքական լուծում գտնելու համար թագավորության ձգտման և շահագրգռվածության շրջանակում»: Ըստ հաղորդագրության՝ նման լուծումը «կպահպանի Սիրիայի միասնությունը, անվտանգությունը, կայունությունը և նրա արաբական ինքնությունը»:
Իր հերթին Սիրիայի նախագահ Բաշար ալ-Ասադը մեծ կարևորություն է տվել արաբական պետությունների դերին՝ սիրիացի ժողովրդին աջակցելու, սիրիական բոլոր տարածքների ազատագրման, իրավիճակի կայունացման և պատերազմի հետևանքների հաղթահարման համար:
Նշենք, որ սիրիական ճգնաժամի մեկնարկից ի վեր սա Սաուդյան Արաբիայի արտգործնախարարի առաջին այցն է Դամասկոս: Սիրիայում ճգնաժամի մեկնարկից հետո, երբ վարչակարգի ուժերը ճնշում էին ընդդիմադիր ուժերին, Պարսից ծոցի մի շարք երկրներ սկսեցին աջակցել ընդդիմադիր ուժերին: Այդ ուժերը պայքարում էին գործող նախագահ Բաշար ալ-Ասադին իշխանությունից հեռացնելու համար: 2011 թվականին նաև կասեցվեց Սիրիայի անդամակցությունն Արաբական պետությունների լիգային: Միայն վերջերս Դամասկոսն ու Ռիյադը պայմանավորվածություն են ձեռք բերել դիվանագիտական հարաբերությունների վերականգնման շուրջ:
Հետևեք մեզ տելեգրամում
