Ռաշթ-Աստարա երկաթուղու կառուցման համաձայնագիրը կարևոր քայլ է Իրանի և Ռուսաստանի միջև համագործակցության զարգացման ուղղությամբ։ Այս մասին հայտարարել է Իրանի նախագահ Էբրահիմ Ռայիսին, ով տեսակապի միջոցով ելույթ է ունեցել համաձայնագրի ստորագրման արարողությանը:
Ռայիսիի խոսքով՝ այս համաձայնագրի ստորագրումից կշահեն ոչ միայն երկու երկրները, այլև Հյուսիս-Հարավ երկաթուղային միջանցքի երթուղու վրա գտնվող երկրները:
Խոսելով Իրանի և ԵԱՏՄ-ը անդամ երկրների հետ հարաբերությունների մասին՝ Ռայիսին հայտնել է, որ հաջորդ քայլը ԵԱՏՄ-ը վեց անդամ երկրների հետ մաքսատուրքերի վերացումն է, որը մեծ քայլ կլինի Իրանի, Ռուսաստանի և ԵԱՏՄ-ի երկրների համար։
Ելույթի ընթացքում Իրանի նախագահն անդրադարձել է նաև Հյուսիս-Հարավ միջանցքի երկաթուղային կապի ուղիներին:
«Այս երկաթուղային միջանցքում ուշադրության կենտրոնում են երեք հատվածներ։ Առաջին մասը՝ այս երթուղու արևելյան հատվածը, ներառում է Ռուսաստանը, Ղազախստանը, Թուրքմենստանը և Իրանը։ Կենտրոնական մասը ներառում է Կասպից ծովը, որտեղ մենք պետք է լուրջ աշխատանք տանենք նավահանգիստների արդիականացման և նավերի հզորացման ուղղությամբ»։
Իր հերթին ՌԴ նախագահ Վլադիմի Պուտինը նույնպես կարևորել է Ռաշթ-Աստարա երկաթուղու կառուցման համաձայնագրի ստորագրումը՝ հույս հայտնելով, որ այս երթուղու ստեղծմամբ կարելի է սննդամթերքի և այլ ապրանքների փոխանակում կատարել Կասպից ավազանի և Պարսից ծոցի երկրների միջև։
ՌԴ նախագահը շեշտել է, որ Ռուսաստանը հատուկ ուշադրություն է դարձնում Թեհրանին, և ձգտում զարգացնել երկկողմ հարաբերությունները։
«Հյուսիս-Հարավ երթուղու կառուցումը պետք է արագացվի, քանի որ Հյուսիս-Հարավ միջանցքը մրցակցային առավելություններ է տալիս ապրանքների տարանցման հարցում»,-հավելել է Պուտինը։
Հետևեք մեզ տելեգրամում
