Հայաստանի իշխանությունները պատրաստ են կարգավորել հայ-թուրքական հարաբերությունները, նույնիսկ մեծ քննադատությունների միջով անցնել, եթե Թուրքիայի կողմից կամք կա այդ հարաբերությունները կարգավորելու։ Ինչպես տեղեկացնում է «Արմենպրես»-ը, Ազգային ժողովում լրագրողների հետ ճեպազրույցում այս մասին ասաց ԱԺ նախագահ Ալեն Սիմոնյանը։
«Թուրքական կողմը, ցանկություն ունենալու պարագայում, կարող է անընդհատ պատճառներ բերել։ Կարող է «Նեմեսիս»-ի արձանը չլինի, ուրիշ բան լինի։ Ես ինքս «Նեմեսիս»-ի արձանի տեղադրումը սխալ եմ համարում, որովհետև դա պետական քաղաքականության գիծ չէ ու չի կարող լինել, բայց նորից եմ ասում, որ դա ընդամենը առիթ էր Թուրքիայի համար։ Ես ինքս հայտարարել եմ՝ Թուրքիա չգնալու համար կարող էի 1 միլիոն պատճառ գտնել ու չգնալ։ Եթե Թուրքիայի կողմից կամքը կա, իսկ ես տպավորություն ունեմ, որ կա, ապա հարաբերությունները կարգավորելու պատմական ու եզակի հնարավորություն կա, մենք դրան պատրաստ ենք, պատրաստ ենք նույնիսկ անցնել մեծ քննադատությունների միջով, բայց երկարատև խաղաղություն բերել հայ ժողովրդին», – ընդգծեց ԱԺ նախագահը:
Նա վստահեցրեց, որ վարչապետ Նիկոլ Փաշինյանի այցը Թուրքիա, որտեղ վերջինս մասնակցել է այդ երկրի նախագահի երդմնակալության արարողությանը, բավականին լավ է անցել։ Սիմոնյանի խոսքով՝ վարչապետը եղել է ուշադրության կենտրոնում:
«Այցը, կարելի է ասել, գլխավոր իրադարձություններից մեկն է եղել», – նշեց ԱԺ նախագահը։
Հետևեք մեզ տելեգրամում
