Իրանական «Afsaran» թելեգրամյան ալիքում տեսանյութ է հրապարկվել, որտեղ մեկնաբանվել է Թուրքիայի նորանշանակ ԱԳ նախարար Հաքան Ֆիդանի կապերը Իրանի հետ և այս առնչությամբ Իսրայելի և ԱՄՆ-ի մտահոգությունները:
«Հաքան Ֆիդանը դեռևս Էրդողանի վարչապետության տարիներին նրա վստահելի աջակիցներից մեկն է եղել, և հաշվի առնելով նախկինում նրա գործունեության նկատմամբ Իսրայելի և ԱՄՆ-ի մտահոգությունները, պարզ է դառնում, որ այժմ ԱԳ նախարարի պաշտոնում նրա նշանակումը, անկասկած, դժգոհություն է առաջացրել Իսրայելում և ԱՄՆ-ում»,- նշվել է տեսանյութում:
Ընդգծվել է, որ Իսրայելի և ԱՄՆ-ի համար անհանգստության պատճառ է նաև այն, որ Ֆիդանին համարում են Իրանի մոտ կանգնած դեմք, քանի որ դեռևս Թուրքիայի Ազգային հետախուզական ծառայության (MIT) ղեկավարի պաշտոնավարման ընթացքում որոշ արևմտյան գործիչներ և վերլուծաբաններ զգուշացնում էին Ֆիդանի՝ Իրանի հետ կապերի մասին։
Հաքան Ֆիդանի՝ որպես Իրանի հետ ունեցած կապերի լավագույն օրինակ ներկայացվել է «Մավի Մարմարա»-ի միջադեպը: Նշվել է, որ Ֆիդանը, համագործակցելով ԻՀՊԿ-ի «Ղոդս» ուժերի հետ, բացահայտել է Իսրայելի և ԱՄՆ-ի հետախուզական գաղտնի տվյալներ:
Հոլովակում համոզմունք է հայտնվել առ այն, որ Ֆիդանի՝ Թուրքիայի արտգործնախարարի պաշտոնում նշանակվելը կնպաստի Մերձավոր Արևելքի երկրների միջև հարաբերությունների կարգավորմանը։
«Մոսադի որոշ անդամներ Հաքան Ֆիդանին համարում են Անկարայում Իրանի հետախուզության գրասենյակի ղեկավար»,- նշվել է տեսանյութի եզրափակիչ հատվածում:
Հետևեք մեզ տելեգրամում
