Ադրբեջանի պաշտոնյաները մեզ ուղերձ են հղել, որ ռազմական հարձակման մտադրություն չունեն: Այս մասին մամուլի ասուլիսում հայտարարել է Իրանի ԱԳՆ խոսնակ Նասեր Քանանին՝ անդրադառնալով Կովկասում լարվածությանը:
«Ըստ Ադրբեջանի պաշտոնյաների՝ նշված տարածքներում տեղաշարժերը ձմեռային սեզոնին պատրաստվելու համար են, քանի որ ձմռանը լեռնային տեղանքում տեղաշարժը դժվարանում է»,- Քանանիի խոսքերը մեջբերել է IRNA լրատվամիջոցը:
Խոսնակը նշել է, որ Հայաստանի պաշտոնյաները Ադրբեջանի կողմից հնարավոր հարձակման շուրջ անհանգստություն են հայտնել՝ հավելելով, որ պաշտոնական Թեհրանը երկու կողմերի հետ մշտական կապի մեջ է:
«Իրանն իր հյուսիսային հարևանների հետ համատեղ սահմանների անվտանգության նկատմամբ զգայուն է և լրջությամբ հետևում է այդ տարածաշրջանի զարգացումներին: Վստահեցնում եմ, որ Իրանի սահմաններն անվտանգ են և Իրանը պաշտպանում է իր սահմանների անվտանգությունը»,- շարունակել է Քանանին:
Քանանին ընդգծել է, որ Իրանը միշտ կարևորել է երկրների տարածքային ամբողջականությունը հարգելու անհրաժեշտությունը և միշտ դեմ է արտահայտվել միջազգայնորեն որոշված սահմանների ցանկացած փոփոխությանը:
«Ղարաբաղն Ադրբեջանի մասն է: Այդ տարածաշրջանի ժողովրդի անվտանգությունն ու իրավունքները պետք է որոշվեն հստակ մեխանիզմով/շրջանակում: Սա մեր պաշտոնական դիրքորոշումն է»,- շեշտել է Իրանի ԱԳՆ խոսնակը:
«Հայաստանի ու Ադրբեջանի կողմից միմյանց տարածքային ամբողջականությունը ճանաչելը կարևոր քայլ կլինի կայուն խաղաղության ու անվտանգության հասնելու համար: Մենք չենք աջակցում ցանկացած գործողություն, որը կարող է ստվերել այս սկզբունքները»,- ավելացրել է Քանանին:
Հետևեք մեզ տելեգրամում
