«Հայքի մշակույթի Օմբուդսմեն» կազմակերպությունն ահազանգում է Արցախում Ադրբեջանի կողմից պատմամշակութային ժառանգության յուրացման և ոչնչացման հերթական դեպքի մասին:
Հաղորդվել է, որ վանդալիզմի դեպքեր են գրանցվել Ստեփանակերտ քաղաքում:
««Ադրբեջանական «REAL TV» ալիքն իր յութուբյան հարթակում փետրվարի 4-ին հրապարակեց տեսանյութ օկուպացված Ստեփանակերտից: Տեսանյութի նախնական ուսումնասիրությունները ցույց են տալիս, որ Արցախի Հանրապետության մայրաքաղաք Ստեփանակերտի Հեքիմյան թաղամասում գտնվող Սուրբ Հակոբ եկեղեցու խաչը հանված է, բացակայում է նաև բակում գտնվող խաչքարը»,- ասված է կազմակերպության տարածած հաղորդագրության մեջ:
Կազմակերպությունը տեղեկացնում է, որ ավելի վաղ ֆեյսբուքյան ադրբեջանցի օգտատեր Ռաֆիկ Մեխտիևն իր էջում Ստեփանակերտից հրապարակել էր հերթական տեսանյութը, որում բացակայում էր Ադմիրալ Իսակովի կիսանդրին: Համապատասխան մշտադիտարկումներից պարզ է դարձել, որ նշված տեսանյութը հրապարակել է դեռևս հունվարի 30-ին:
Ստեփանակերտում տեղի ունեցած հերթական վանդալիզմի մասին ահազանգել է Արցախի մշակութային ժառանգության պաշտպանության հանրային խորհրդի ՀԿ նախագահ Սերգեյ Շահվերդյանը՝ ֆեյսբուքյան իր էջում հրապարակելով ադրբեջանցիների կողմից քանդված Ալեքսանդր Մյասնիկյանի արձանի լուսանկարները։
Իսկ փետրվարի 9-ին «Արարատ» տելեգրամյան ալիքը հրապարակել էր Հադրութում տեղի ունեցած հերթական սրբապղծության լուսանկար: Արցախի Հադրութի՝ պատմական Դիզակի տարածքում օկուպանտի կողմից պղծվել է Հադրութի Սբ․ Հարություն եկեղեցու բակում գտնվող վանականներից մեկի տապանաքարը:
Հետևեք մեզ տելեգրամում
