Բաքվի վերաքննիչ դատարանը մերժել է ադրբեջանցի ընդդիմադիր լրագրող Սևինջ Վագիֆգըզըի բողոքը՝ նախնական կալանքի ժամկետը ևս երեք ամսով երկարացնելու մասին: Այս մասին ադրբեջանական ԶԼՄ-ներին հայտնել է լրագրողի փաստաբանը:
Փաստաբանի խոսքով՝ Սևինջ Վագիֆգըզըն պահվում է Բաքվի քննչական մեկուսարանի վատ պայմաններում։ Նրա խուցը չի ջեռուցվում, իսկ ջեռուցման համակարգի խողովակները պայթել են, և ջուրը տարածվել է ամբողջ խցով մեկ։
Նշենք, որ Սևինջ Վագիֆգըզը ադրբեջանական «Abzas Media» ընդդիմադիր լրատվամիջոցի գլխավոր խմբագիրն է: Վագիֆգըզըն և «Abzas Media»-ի ևս հինգ լրագրող ձերբակալվել են մաքսանենգության մեղադրանքով։ Լրագրողները, սակայն, հերքում են իրենց վերագրվող մեղադրանքները՝ պնդելով, որ իրենց պարզապես հետապնդում են «Abzas Media»-ում հրապարակված հակակոռուպցիոն հետաքննության համար։
Թեմային անդրադարձել էր նաև «Reuters»-ը՝ հիշեցնելով, որ լրագրող Սևինջ Վագիֆգըզըն ձերբակալվել է դեռևս անցյալ տարի նոյեմբերին՝ Ադրբեջան ժամանելուն պես: Ավելի վաղ ձերբակալվել էր նաև Վագիֆգըզըի գործընկեր Ուլվի Հասանլըն, ով ևս ղեկվարում էր «Abzas Media»-ն: Միջազգային իրավապաշտպան խմբերը ենթադրում են, որ մեղադրանքները շինծու են և անկախ ԶԼՄ-ների դեմ կառավարական ճնշումների մաս են կազմում:
Ավելի վաղ հաղորդել էինք, որ Ադրբեջանում ձերբակալվել է Ժողորվրդական ճակատ» ընդդիմադիր կուսակցության Դաշքեսանի գրասենյակի ղեկավար Սաիդ Մամեդզադեն: Նրա նկատմամբ քրեական գործ է հարուցվել թմրանյութերի անօրինական շրջանառություն իրականացնելու կասկածանքով:
Հետևեք մեզ տելեգրամում
