Թուրքիայի նախագահ Ռեջեփ Թայիփ Էրդողանը Պոլսի Հայոց պատրիարքարանին և հայ համայնքին հղել է իր ավանդական ապրիլքսանչորսյան «ցավակացական» ուղեձը, որում Հայոց ցեղասպանության զոհերին որակել է որպես «Առաջին համաշխարհային պատերազմի ծանր պայմաններում իրենց կյանքը կորցրած Օսմանյան կայսրության հայ քաղաքացիներ»։
«Օսմանյան հողերում Առաջին աշխարհամարտի պատճառած ավերածությունները խորը հետք են թողել մեր հիշողության մեջ։ Մեր նախնիներից ժառանգած խաղաղության և հանգստության մթնոլորտի շարունակությունը հնարավոր է միայն մեր համատեղ ջանքերով։ Բախումների, ապստամբությունների, ավազակախմբային գործողությունների և ահաբեկման գործողությունների պատճառով մահացած, նահատակված օսմանյան հասարակության մեր բոլոր անդամների համար Ալլահից ողորմություն եմ խնդրում։»,- նշել է Էրդողանը ապա ավելացրել, որ «Թուրքիայի հայ քաղաքացիների անվտանգությունը, բարեկեցությունն ու երջանկությունը այսօր էլ երաշխավորված են»։
Հայոց Ցեղասպանության ոճիրը չճանաչող և իր անցյալի հետ առերեսվելուց հրաժարվող երկրի ղեկավարը ուղերձում նշել է, թե «պետք է դասեր քաղել անցյալի ընդհանուր ցավից»։
«Մենք հավատում ենք, որ ապագա սերունդներին աշխարհը շրջապատող բռնության և պատերազմի պարույրից պաշտպանելու ճանապարհը մեր ապագան միասին կառուցելն է՝ այն դասերի լույսի ներքո, որոնք մենք կքաղենք մեր ընդհանուր ցավից»,- ասել է Թուրքիայի նախագահը։
Հետևեք մեզ տելեգրամում
