Իրանի նախագահի գրասենյակի ղեկավար Ղոլամհոսեյն Էսմայիլին մանրամասներ է ներկայացրել Արևելյան Ատրպատական Էբրահիմ Ռայիսիի այցից և տեղի ունեցած միջադեպից: Տեղեկությունը փոխանցում է իրանական «ISNA» լրատամիջոցը:
Էսմայիլին նշել է, որ Թավրիզից լավ եղանակային պայմաններում մեկնել են Խոդաֆարին, հետվերադարձին ևս, երբ նորից ուղղաթիռ են նստել, եղանակը լավ ու պարզ է եղել, իսկ թռիչքի ճանապարհին մառախուղ չի եղել:
«Նախագահին տեղափոխող ուղղաթիռի օդաչուն, որպես հրամանատար, հրահանգեց, որ բարձրություն վերցնենք և ամպերի վերևից ճանապարհը շարունակենք: Ուղղաթիռները մեծացրին թռիչքի բարձրությունը և մոտ 30 վարկյան անց մեր օդաչուն հասկացավ, որ նախագահի ուղղաթիռը չկա»,- պատմել է Էսմայիլին՝ հավելելով, որ իրենց ուղղաթիռը պտտվել է մի քանի անգամ և ռադիոկապ հաստատել չի հաջողել: Նրա խոսքով՝ միայն 30 վարկյան անց իրենց ուղղաթիռը վայրէջք է կատարել Սունգունի հանք:
«Ուղղաթիռի ուղևորների հետ կապ էին փորձում հաստատել, սակայն ոչ ոք չէր պատասխանում: Հետո մեզ ասացին, որ զանգել են կապիտան Մուստաֆավիի բջջային հեռախոսին և պարոն ալ-Հաշեմն է պատասխանել և ասել, որ ձորն է ընկել, բայց չի ասել, թե ինչ է եղել: Հետո, երբ ես կապ հաստատեցի, պարոն ալ-Հաշեմն ասաց՝ «լավ չեմ զգում ինձ, չգիտեմ՝ ինչ է եղել, չգիտեմ՝ որտեղ եմ, ծառերի տակ եմ, ոչ մեկի չեմ տեսնում, մենակ եմ»»,- հայտնել է Էսմայիլին:
Իրանի նախագահի գրասենյակի ղեկավարը շարունակել է՝ հավելելով, որ ալ-Հաշեմի՝ անտառի նկարագրությունը ստանալուն պես շտապօգնություն և բուժանձնակազմ են վերցրել և մեկնել դեպքի վայր:
«Պարոն ալ-Հաշեմի հետ մի քանի անգամ խոսել ենք, երևի մոտ երեք ժամ պատասխանել է զանգերին: Հետո պարզվեց, որ բոլորը միանգամից են նահատակվել, իսկ պարոն ալ Հաշեմը՝ մի քանի ժամ անց»,- ասել է Էսմայիլին՝ շեշտելով, որ ոչ պայթյունի ձայն է եղել, ոչ կրակ, ոչ էլ ծուխ։
Պաշտոնյայի խոսքով՝ երբ փրկարարները հասել են դեպքի վայր, եղանակն ամբողջովին փոխվել էր:
«Ես չգիտեմ, թե ուղղաթիռային թռիչքի համար եղանակային պայմանների ստանդարտը որն է, բայց այն, ինչն իմ աչքով եմ տեսել, այն էր, որ թռիչքի ժամանակ պայմանները սովորական էին: Միայն մի ձորում և մի շատ սահմանափակ հատվածում ենք ամպ տեսել, որը ես չեմ կարող ասել թռիչքը կանխարգելող գործոն կարող էր լինել, թե չէ»,-ասել է նա:
Հետևեք մեզ տելեգրամում
