Վրաստանի պաշտպանության նախարար Իրակլի Չիքովանին հանդիպել է իր ադրբեջանցի գործընկեր Զաքիր Հասանովի հետ։ Տեղեկությունը հայտնում են վրացական ԶԼՄ-ները:
Պաշտպանության նախարարներն առանձին հանդիպում են ունեցել, ապա ընդլայնված կազմով հանդիպման ընթացքում քննարկել են Վրաստանի և Ադրբեջանի միջև պաշտպանական համագործակցության ուղղությունները և անդրադարձ կատարել տարածաշրջանի անվտանգության խնդիրներին։
Նշվել է, որ երկրների միջև ռազմավարական գործընկերությունը հիմնված է հարգանքի և վստահության վրա, ինչը մեծ նշանակություն ունի տարածաշրջանի անվտանգության և զարգացման համար։
Ուշադրություն է դարձվել նաև Վրաստանի առաջարկած խաղաղ հարևանության նախաձեռնության ձևաչափին, որի նպատակն է նպաստել տարածաշրջանում խաղաղության գործընթացին։
Հանդիպմանը մտքեր է փոխանակվել նաև Ադրբեջան-Թուրքիա-Վրաստան եռակողմ համագործակցության ձևաչափի շուրջ։
Հետևեք մեզ տելեգրամում
