Իրանի նախագահ Մասուդ Փեզեշքիանը հեռախոսազրույց է ունեցել Գերմանիայի կանցլեր Օլաֆ Շոլցի հետ: Այս մասին հաղորդագրություն է տարածել Իրանի նախագահի գրասենյակը:
Հեռախոսազրույցի ընթացքում Փեզեշքիանն ընդգծել է Իրանի և եվրոպական երկրների միջև հարաբերությունների բարելավման խոչընդոտների վերացման անհրաժեշտությունը՝ հավելելով, որ Իրանը պատրաստ է զարգացնել հարաբերությունները բոլոր եվրոպական երկրների, այդ թվում Գերմանիայի հետ՝ բարեկամության, փոխվստահության և փոխադարձ հարգանքի հիման վրա:
Իրանի նախագահը կարևորել է աշխարհում և տարածաշրջանում խաղաղության, կայունության և անվտանգության պահպանումը՝ դատապարտելով Գազայի հատվածում Իսրայելի գործողությունները։
Փեզեշքիանը նշել է, որ Իրանը միշտ հետևել է միջազգային օրենքներին և պատրաստ է երկխոսության միջոցով լուծել խնդիրները, բայց երբեք չի ընդունի ճնշումները, պատժամիջոցները և ուժի կիրառումը, շեշտելով, որ Իրանը միջազգային չափանիշներով իր իրավունքն է համարում պատասխանել ագրեսորներին։
Իր հերթին Օլաֆ Շոլցը շնորհավորել է Փեզեշքիանին Իրանի նախագահի պաշտոնում ընտրվելու կապակցությամբ և ընդգծել Գերմանիայի պատրաստակամությունն ու շահագրգռվածությունը բոլոր ոլորտներում Իրանի հետ հարաբերությունները բարելավելու հարցում։
Հետևեք մեզ տելեգրամում
