Վարչապետ Բենիամին Նեթանյահուն չպետք է մոռանա, որ ՄԱԿ-ի բանաձևով է ստեղծվել Իսրայելը: Այս մասին հայտարարել է Ֆրանսիայի նախագահ Էմանուել Մակրոնը նախարարների հետ հանդիպման ժամանակ:
«Նեթանյահուն չպետք է մոռանա, որ իր երկիրը ստեղծվել է ՄԱԿ-ի որոշմամբ։ Հետևաբար, նա չպետք է ազատվի ՄԱԿ-ի որոշումներից», – փակ դռների հետևում կայացած հանդիպման ժամանակ Մակրոնի խոսքերը մեջբերում է ֆրանսիական Le Parisien թերթը:
«Հիշեցում Ֆրանսիայի նախագահին. ոչ թե ՄԱԿ-ի որոշումն էր, որը ստեղծեց Իսրայել պետությունը, այլ հաղթանակը, որը ձեռք բերվեց Անկախության պատերազմում մեր հերոս մարտիկների արյունով, որոնցից շատերը Հոլոքոստը վերապրածներ էին, այդ թվում՝ Ֆրանսիայի Վիշիի ռեժիմից»,- ի պատասխան Մակրոնի խոսքերի՝ հայտարարություն է տարածել Նեթանյահուի գրասենյակը:
Le Parisien թերթը գրել է, որ Ֆրանսիայի նախագահի մեկնաբանություններն արվել են Լիբանանի հարավում Իսրայելի ձեռնարկած գործողության, ինչպես նաև Լիբանանում ՄԱԿ-ի ժամանակավոր ուժերի (UNIFIL) դիրքերի ուղղությամբ կրակ բացելու համատեքստում:
Նշենք նաև, որ Նեթանյահուն դիմել էր ՄԱԿ-ի գլխավոր քարտուղար Անտոնիո Գուտերեշին՝ առաջարկելով տարհանել ՄԱԿ-ի ուժերը Լիբանանի հարավային հատվածից, սակայն մերժում է ստացել:
«Խաղաղապահները մնում են իրենց դիրքերում, իսկ ՄԱԿ-ի դրոշը շարունակում է ծածանվել»,- ասել է ՄԱԿ-ի գլխավոր քարտուղարի խոսնակը:
Հետևեք մեզ տելեգրամում
