Եվրամիության դիվանագիտական ծառայության ղեկավար Ժոզեպ Բորելը կազմակերպության երկրներին առաջարկել է դադարեցնել քաղաքական երկխոսությունը Իսրայելի հետ՝ պատճառաբանելով Գազայի հատվածում իսրայելական ռազմական գործողության ընթացքում մարդու իրավունքների հնարավոր խախտումները։ Այս մասին հայտնում է Reuters-ը՝ հղում անելով եվրոպացի դիվանագետներին և Բորելի համապատասխան նամակին։
Նամակն ուղարկվել է ԵՄ ԱԳ նախարարներին չորեքշաբթի օրը՝ նոյեմբերի 18-ին Բրյուսելում նրանց հանդիպումից օրեր առաջ: Բորելի համար արտգործնախարարների այս գագաթնաժողովը վերջինը կլինի որպես ԵՄ արտաքին գործերի և անվտանգության քաղաքականության բարձր ներկայացուցիչ, քանի որ նա կհեռանա պաշտոնից դեկտեմբերի 1-ին, երբ նոր Եվրահանձնաժողովը կանցնի աշխատանքի։
Նամակում Բորելը լուրջ մտահոգություն է հայտնում Գազայում միջազգային մարդասիրական իրավունքի հնարավոր խախտումների վերաբերյալ, ինչպես նաև նշում է, որ, իր կարծիքով, Իսրայելը դեռ պատշաճ կերպով չի արձագանքել այդ մտահոգություններին։
«Ելնելով այս հանգամանքներից՝ ես առաջարկ կներկայացնեմ ԵՄ-ին օգտագործել երկկողմ համաձայնագրի` մարդու իրավունքների վերաբերյալ դրույթը Իսրայելի հետ քաղաքական երկխոսությունը դադարեցնելու համար»,-Բորելի խոսքերն է մեջբերում Reuters գործակալությունը։
Հետևեք մեզ տելեգրամում
