Աբխազիայի նախագահ Ասլան Բժանիան նոյեմբերի 19-ի գիշերը ընդդիմության հետ բանակցություններից հետո հրաժարական է տվել։ Բժանիայի hամապատասխան հայտարարությունը՝ ուղղված մասամբ ճանաչված հանրապետության խորհրդարանի խոսնակ Լալա Աշուբային, հրապարակել է Աբխազիայի նախագահի մամուլի ծառայությունը։
«Երկրում կայունությունն ու սահմանադրական կարգը պահպանելու համար, Աբխազիայի Հանրապետության Սահմանադրության 63-րդ հոդվածի համաձայն, ես հրաժարական եմ ներկայացնում Աբխազիայի Հանրապետության նախագահի պաշտոնից»,- ասվում է բանակցությունների արդյունքներից հետո հրապարակված փաստաթղթում։
Բժանիայի հրաժարականի դիմումը նոյեմբերի 19-ին պետք է քննարկի Աբխազիայի խորհրդարանը, որի շենքը դեռևս գրավված է ընդդիմության կողմից։
Ըստ բանակցությունների արդյունքում ստորագրված համաձայնագրի՝ ընդդիմությունն ու իր կողմնակիցները պետք է լքեն նոյեմբերի 15-ին Սուխումի կենտրոնում իր կողմնակիցների կողմից գրավված կառավարական շենքերը և ցրվի, հակառակ դեպքում Բժանիան հետ կկանչի իր դիմումը։
Աբխազիայի Սահմանադրության համաձայն, և դա ընդգծված է ստորագրված փաստաթղթում, նախագահի պաշտոնակատար կդառնա փոխնախագահ Բադրա Գյունբան, իսկ վարչապետի պաշտոնակատար՝ նախկինում այդ պաշտոնը զբաղեցրած Վալերի Բգանբան։
Աբխազիայի մայրաքաղաքում բողոքի ցույցերը սկսվել են մեկ շաբաթ առաջ։ Նոյեմբերի 15-ին ընդդիմության կողմնակիցները ներխուժեցին կառավարության շենք և գրավեցին այն՝ պահանջելով Բժանիայի հրաժարականը։ Պատճառը Ռուսաստանի հետ նոր ներդրումային համաձայնագիր կնքելու իշխանությունների մտադրությունն էր, որը ռուս իրավաբանական անձանց թույլ կտար հանրապետության տարածքում ներդրումային ծրագրեր իրականացնել։
Հետևեք մեզ տելեգրամում
