Թուրքիան մտադիր չէ ռազմական գործողություն իրականացնել Սիրիայի քրդական ուժերի դեմ, եթե Սիրիայի նոր իշխանությունները լիակատար վերահսկողություն սահմանեն երկրի տարածքում, ասել է Թուրքիայի արտգործնախարար Հաքան Ֆիդանը։
«Սիրիայում, «Ժողովրդական ինքնապաշտպանության ուժերը» լուրջ սպառնալիք են Թուրքիայի համար»,- ասել է նա Al Jazeera-ի հարցազրույցում։
«Այժմ Դամասկոսում նոր վարչակազմ է։ Ես կարծում եմ, որ հիմա դա առաջին հերթին նրանց խնդիրն է։ Ուստի ես կարծում եմ, որ եթե նրանք զբաղվեն այդ հարցով ինչպես հարկն է, մենք միջամտության պատճառ չենք ունենա»,- նշել է Ֆիդանը՝ մեկնաբանելով ԶԼՄ տարածած տեղեկությունները Սիրիայում ռազմական գործողություններ իրականացվելու վերաբերյալ տեղեկությունները:
Ֆիդանը նշել է, որ Թուրքիան մտադիր չէ վտարել սիրիացի փախստականներին, որոնք երկիր են եկել Սիրիայի քաղաքացիական պատերազմի տարիներին։
«Մենք հուսով ենք, որ նրանք կվերադառնան ինքնակամ եւ անվտանգ, եթե ցանկանան,՝ գնահատելով նոր իրողությունը»,- շարունակել է Ֆիդանը։ Նա կարծում է, որ կայունացմանը զուգնթաց՝ Սիրիա կվերադառնան ավելի շատ փախստականներ։
Հետևեք մեզ տելեգրամում
